SHILLONG: GHADC election-o non-tribal-rangko susana on·jawa ine champengatani gisepo saksa non-tribal-ni nomination file ka·na re·baani ja·mano Garo Hills-o kajia-golmal ong·gipaoni Meghalaya Sorkari jaksugalna jotton ka·aha.
Ian Garo Hills Autonomous District Council (GHADC)-ni bilni ning·aoni a·bachengaha, jean an·tangtangchin jakgitele sason ka·gipa nokdang ong·a ine Deputy Chief Minister in charge Home aro NPP State President, Prestone Tynsong Butbaro aganaha.
A·dok Sorkari gitan, an·tangni jurisdiction-ode autonomous district council-rang, uamangon legislative, executive aro judicial powers ba bilrang gnang ine aganengon, ia a·selrangna A·dok Sorkariko matnangna man·jawa, maina district council-on chu·gimik bil gnang ine Tynsong aganaha.
“A·dok Sorkari gitan apanangpile, uamangoni legislative, executive aro judicial powers ba bilrang donga” ineba Dy CM aganaha.
GHADC-ni notification on·gipako Meghalaya High Court-ni de·gale rai on·gipani bidingo sing·anina aganchakengon, GHADC-ni notification on·gipao niam gita badiabarango tik ong·gijani dongaha ine Court janapaha aro uamangni chanchi ra·gatanio niamko namedake ja·rikgijaniko kachari janapaha ine Tynsong aganaha.
Uni aganani gita, maiaba dal·a ja·kuko de·on ba re·mikkanganiko dakon,district council-ni Executive Committee-o ra·chakchengna nanga uni ja·manosa House-na chanchina gita ra·bana nanga aro uko ra·chakna nanga.
Indake House-o ra·chakgimin niamkosa Governor-ni rai on·aniko ra·na gita uona watatna nanga. “Da·omiting GHADC-ni notification on·aniara chu·gimik ong·jaha aro daksogimin niam gita ong·jaha” ine ua aganaha.
Manderangni nangnikaniko u·imanchaa ong·ongode Council an·tangba dingtangmancha session-ko ong·atenba iani bidingo chanchianiko dakna nangachim, Tynsong agandapaha.
Garo Hills-o so·sojengjeng ong·anirang batroroani gimin April 10 tariko ong·atna manchigimin GHADC election-ko dontongatkuna sorkari tik ka·aha aro mikkangchi maidake kamrangko ka·gen, Bristibaro cabinet tom·enba chanchirimgen ineba Dy CM aganaha.
Tura aro Williamnagar-ko man·chape Garo Hills-ni mitam biaparango adita a·sel ong·ani koborangko man·soaha, National People’s Party office-ko aro daksam olakichakram biapko nosto ka·aha ineba koboko man·soaha.
Jatgni nanggrikani somoio, re·anggipa Sombaro sakgni manderang nisiatako man·aha, siani a·selko sandienga aro ian haida police-ni jakode so·ota man·jakon, indiba chu·gimik koborna sengenga ineba ua aganaha.
