Tom·tomaniko ra·bapilchina didia
TURA: Garo Hills Autonomous District Council (GHADC) election-o Tribal ong·gijagipa manderangni bak ra·paaniko jegale so·sojengjeng ong·atanio, Tura-o ramram manderangni dokkanrang, nokrang aro gari gorarangko nisie galanikoba nikna man·aha.
Tura-o so·sojengjeng ong·ani Budbar walo bilongbatangaha aro so·sojengjeng ong·atgipa manderang, Tura Hawakhana-oni a·bachenge, Araimile jolrangonan, dokkanrangko, nokrangko aro ma·manti gam-jinrangko nisie galangaha.
Official-rangni u·iatani gitade, so·sojengjeng ong·atanio badiaba dolni manderangsa cholrangko ra·e, manderangni gam-jinrangko nisie galaha aro badiaba badiaba biaprangode, dokkanrangkoba pe·e, dokkanni bosturangkoba ra·e kataha.
Ia obosta ong·anio mingsa namen dukni kattade, so·sojengjeng ong·atgipa manderang, dokkanrango ‘A·chik a·song tangbangchina’ ine seaha indiba A·chikskani dokkanrangkon wa·alrang so·aha.
Iandake jatskani gam-jinrangko nisie galanina bang·a manderangan suk ong·gijaniko paraktokaha.
“GHADC election-o Tribal ong·gijagipa manderangni bak ra·aniko jegalanio A·chik jat gimikan bak ra·aha aro namnikgijanikoba mesokaha indiba jingjengatanirangko dakanio jatskani gam-jinrangkon nisie galaniara miksonganian namen dingtangaha. So·sojengjeng ong·atengon, kraa gita kamrangkosa mesokna nangachim indiba jatskani gam-jinrangkode indake nisina nangjachim,” ine Tura-o songdonggipa me·apa saksa aganaha.
So·sojengjeng ong·atani kamrangko dontongchina aro tom·tomaniko ra·bapilna gita ku·cholsan kam ka·china gitaba dingtang dingtang A·chik dilgiparang, Garo Hills-ni manderangko mol·molataha.
Indake ong·engon, Budbar walo nosto ka·gipa dingtang dingtang biaprangko Tura-o songdongenggipa dingtang dingtang gittimni manderang an·tangtangan rongtalatna daitoko ra·e kamrangko ka·angaha.
Tom·tomaniko ra·bapilna gita District Administration-ba Bristibar pringo, dingtang dingtang gittimni manderang, toromni dilgiparang aro songsalko dilenggipa manderang baksa tom·aniko ong·atangaha aro ia tom·aniko Tura Municipal Board (TMB)-ni Chief Executive Officer (CEO) Jude Rangku T Sangma dilangaha.
Ia tom·anio jinma chanchirimengon, Garo Hills-o, mongsongbate Tura songjinmao tom·tomaniko ra·bapilna gita pilakan ku·cholsan ong·e kam ka·na ine tik ka·angaha.
So·sojengjeng ong·atgiparang donggenchimode, dingtang dingtang gittimrango songdongenggipa manderang an·tangtangan iarangko champengna ja·kuko de·gen ineba ia tom·anio tik ka·angaha.
