TURA: Garo Hills Autonomous District Council (GHADC) election-o Tribal ong·gijagipa manderangni susapaaniko jegale so·sojengjeng ong·angani ja·man GHADC election-ko ra·dona gita a·dok sorkarini tik ka·aniko Meghalaya a·dokni Nationalist Congress Party (NCP) raken jegalatskaaha.
GHADC election-o Tribal ong·gijagipa manderangni susana gita nomination file ka·na re·baani ja·man Garo Hills-ni dingtang dingtang biaprango jatgni dinggrikanirangko nikna man·ahachim aro bang·a biaprangon, so·sojengjeng ong·anirangkoba nikna man·ahachim. Iandake so·sojengjeng ong·angani ja·man GHADC election-ko ra·dona gita Budbar salo a·dokni Chief Minister Conrad K Sangma parakatahachim.
Indake ong·engon, GHADC election-ko ra·dona gita Chief Minister-ni parakataniko NCP Meghalaya Unit jegalatskaenba, ian election-na tarisamsoenggipa political party-rangna aro candidate-rangnade ra·chakna man·gijani ong·enga ine parakataha.
“GHADC election-ko April 10 tariko ong·atna parakatani ja·man da·o rang·gitik election-ko ra·dona gita sorkarini tik ka·aniko NCP Meghalaya State Unit ra·chakna man·ja maina GHADC-o Tribal ong·gijagipa manderangni susaani aro bak ra·aniko batanggimin bilsirangonin A·chikrang jegaltokengahachim. Indita jegalanirangko nikengoba Conrad Sangma-chi dilenggipa sorkari, GHADC election-ko April 10 tariko ong·atna parakataha. Election-ni tarikko parakatahaon ian political dolrangni jako ong·aha aro political dol antian an·tangtangni candidate-rangko seoke, nomination file ka·naba a·bachengpilaha. Da·o rang·gitik political party-rang baksa agangrikchenggija election-ko ra·dona tik ka·aha. Tarikko parakatani ja·man election-ko ra·doaniara namen kragijani ong·a,” ine NCP-ni state president OK Sangma parakataha.
Election-ni tarikko parakna skangan Chief Minister aro uni intelligence-rang, name obostarangko nichengna nangachim ine janapatengon, “Political party-rang aro candidate-rang indita tangka paisarangko koros ka·samsoaha indide ia korosrangko da·o sawa uamangna gamgnok? GHADC election-ko ra·doaniara Conrad Sangma-chi dilenggipa sorkarini niksamsoani dongjani a·selan ong·a aro ia pilakan Chief Minister-ni daian ong·aha,” ine NCP-ni state president parakatenba, iani bidingo Chief Minister-ko kam watchina dabiangaha.
