ATM-rango tangka dongjae neng·nikanirangko man·a
TURA: Garo Hills-o, mongsongbate Tura songjinmao obostarang namsrangkujaengani gimin curfew-ko ra·gatkuengon, Sukrobar salo pring 9:00 bajioni attam 1:00 bajiona curfew-ko neng·takataha aro curfew-ko kontabrina neng·takatengmiting somoio manderangni koros ka·chichaanirangko nikna man·aha.
Sukrobar pring 9:00 baji dipet curfew-ko neng·takata bakan manderangni bazar antirangchi koros ka·na ong·katanirangko bang·en nikna man·aha aro dokkanrango manderangni chakpilgija koros ka·anirangkoba nikna man·aha.
Tura songjinmani mongsonggipa biaprang, jekai Tura Bazar, Ringre, Chandmari, Araimile, Hawakhana aro uandakgipa biaprango mitam dokkanrangni kulianiko nikna man·aha indiba bang·bata dokkanrangkon chipe dontokaiaha.
Be·en bitin palgipa biaprangoba manderangni koros ka·chichaanirangko nikna man·aha aro bang·bata biaprangon be·en bitinrangni chu·onggijaniko nikna man·aha.
Tura songjinmani bang·bata petrol pump-rangkon ia salni bako chipe dontokaha aro Hawakhana-o donggipa AOC petrol pump-kosan kuliaiahani gimin ia petrol pump-o gari gorarangni chakpilgija riting dake senganikoba nikna man·aha.
Indake ong·engon, Tura-ni bang·bata Automated Teller Machine (ATM) booth-rangon tangka paisarang dongjani a·sel manderang neng·nikanirangko chagrongna nangtokaha ine kobor on·timgiparang parakataha.
Koborko on·ani gitade, Tura-ni bang·bata ATM booth-rangon tangka paisarang dongtokjaha aro badiaba badiaba ATM booth-rangosan tangka paisarang dongaiani gimin manderang, ua ATM booth-rangon ro·pile riting dakna nangtokaha.“Indita salrangna merong mechu dongjae neng·nikanirangko man·engon, curfew-ko relax ka·ani somoirangoba ATM-rango tangka paisa dongjae chinga koros ka·e cha·namangmangba man·jaha. Mobile internet-koba chipe donatahani a·sel chinga mobile banking-koba dakna man·ja indide chinga maikai koros ka·e cha·na man·gen? ATM-rango tangka paisarangko chipchina District Administration ge·etaniko on·na nangchongmota,” ine Tura-ni me·chikma saksa kobor ra·timgiparangna aganaha.
