TURA: Garo Hills Autonomous District Council (GHADC)-ni term-ko jadokna ra·dodapataniara badiaba political party-nasan namgni ong·aigen aro ian Garo Hills-o songdongenggipa manderangnade maming namgniko ra·bajawa ine Mongolbar salo, Tura-ni MDC aro Bharatiya Janata Party (BJP)-ni state vice president Bernard N Marak, GHADC-ni term-ko ra·dodapgija, ta·raken election-ko ong·atchina a·dok sorkariko didiataha.
Iani bidingo a·dokni Deputy Chief Minister aro District Council Affairs (DCA) Minister Prestone Tynsong-na sedoatengon, batanggimin somoirango manderangni gisepo ding·chaoanirang ong·kate so·sojengjeng ong·ahani giminsa GHADC election-ko ra·doatahachim indiba manderang, GHADC election-o Tribal ong·gijagipa manderangni susapaaniko champengna Scheduled Tribe (ST) certificate-ko nangtelgipa ong·atna Special Session-ko ong·atgen ine ka·donganirangko man·ahani gimin da·o tom·tomangpilahachim ine Marak parakataha.
“GHADC election-o susana gita candidate-rang ST certificate-ko mesokna nangtelgen ine angni resolution ra·baanio pangchake manderang, iani bidingo special session-ko ong·atgen ine ka·dongsotokahani giminsa da·alo so·sojengjeng ong·anirang namangpilaha. Indake ong·genchimoba, GHADC-ni term-ko da·o jadokna ra·dodapataniara Garo Hills-ni manderangnade maming namgniko ra·bajaenga indiba badiaba political party-nasan namgni ong·aigen,” ine Tura MDC parakataha.
Da·o ong·enggipa GHADC-ni term April 18 tarikosa bon·engani gimin ST certificate-ni bidingo resolution-ko ra·na gita da·o ong·na sienggipa budget session-ni somoion man·aigen ine janapatengon, iana resolution-ko ra·na gita jadok somoiko nangjaengani gimin GHADC-ni term-ko ra·dodapatchina mol·molenga ine Marak, a·dokni Deputy Chief Minister aro DCA Minister-na sedoatgipa chittio janapataha.
GHADC-ni gital Chief Executive Membor (CEM)-na chakpagipa BJP-ni MDC sakgnikode da·o gital Executive Committee nichanggalenga ineba Tura-ni BJP MDC matnangataha.
“BJP-ni MDC sakgnian gital CEM-ko seokanio chakpaaniko on·ahaoba uamang sakgnikode gital EC-ni chanchirimanirango okampajaha aro nichanggalaha,” ine Marak parakataha.
GHADC-ni term-ko April 18 tarikoni October 18 tarikona jadokna a·dok sorkari ra·dodapna tik ka·angahachim ine nikna man·a.
GHADC-ni term-ko ra·doaniara badiaba party-nasa namgni ong·aigen: Bernard
Date:
Share post:
