SHILLONG: NPP baksa melienga ine jangbingbanganirangna talatengon Opposition dilgipa Dr. Mukul Sangma, Sonibar salo indine aganaha, “GHADC-ni mamlako gipin mamla ba bakrang baksa nangdimatna jotton ka·nabe.”
Garo Hills Autonomous District Council (GHADC)-o bakrimaniara Garo Hills-o ong·enggipa obostani giminsa ong·a jeni a·sel seoka man·gipa gimik MDC-rang apsan ku·cholsan ong·e kam ka·na nangao ga·aka, ua kattarangko gipin politics-ona ra·angna nangja ine Dr. Sangma talataha.
Council-o bakrime ja·ku de·aniara Garo Hills-ni A·chik jatrangni namgnina pakripee kam ka·na seoka man·gipa gimik MDC-rangni daito ong·a. Jedakode A·chik jatni manderangna ku·cholsan ong·e kam ka·na man·gen unasa council-o bakrimaha.
Jatni namgnina re·mikkangengaon darang Memboran champenggipa ong·jachina ine janape Dr. Sangma, gimik MDC-rangko House-o apsan ku·cholsan ong·e chanchirimna mol·molaha.
GHADC-o bakrimanina mikkangchi Meghalaya Legislative Assembly-o bakrimnaba donga ine chanchinabe, ine Dr. Mukul talataha.
Iarangni gispeon Dr. Mukul, Garo Hills-o NGO-rangni dilgiparangko rim·ani giminba jajrenganiko parakaha. Governor-na memorandum-o on·e kobor ra·timgiprang baksa agangrikmitingo indine aganaha, “obosta ong·ani mamlarangko sandiengon aro rim·engon niamko chu·gimik ja·rike aro tale am·sandianirangko dake sakkirangko nigrikesa rim·na nanga.
ACHIK-ni Johnny A Marak aro Garo State Movement Committee (GSMC)-ni Balkarin Marak -ko golmal ong·ani mamlao Police rim·aha. Iana CoMSO, jingjengatna mikrakataha.
