GHADC-o gital niamko ra·chakaniara A·chik jatni dal·begipa cheani: Bernard

TURA: Garo Hills Autonomous District Council (GHADC) election-rango Tribal ong·gijagipa manderang bak ra·pana man·jana gita GHADC-o taridape pass ka·anggipa Assam & Meghalaya Autonomous District (Constitution of District Councils) Rules-ko Mongolbar salo, a·dokni Governor CH Vijayashankar ra·chakahani gimin ian darang political party-ni ba badiaba dolrangni cheani ong·ja indiba A·chik jatni dal·begipa cheanisa ong·aha ine Mongolbar attamo, Tura-ni MDC aro BJP-ni state vice president Bernard N Marak parakataha.
Marak-ni parakatani gitade, GHADC-ni pass ka·e watatgipa Bill-ni bidingo ua ma·mong sorkarini dilgiparang baksa agangrikaton, ia Bill-ko Mongolbar salni bakon pass ka·gen ine ma·mongni dilgiparang ku·rachakaniko on·ataha aro Mongolbar salni gisepon, a·dokni Governor, ia Bill-ko pass ka·e da·o niamo ong·ataha.
“Ian A·chik jatni dal·begipa cheani ong·a. Ia Bill-ko GHADC-o pass ka·ani ja·man bang·bata manderangan angko maini gimin jrip dongenga ine chanchiengachim indiba anga jrip dongja indiba ia Bill-ko ta·raken Governor ra·chakchina gitasa chinga kam ka·engachim. Da·al pringni bako anga ma·mongni dilgiparang baksa golpoaton, da·al salni bakon ra·chakgen ine uamang angna ku·rachakaniko on·ataha. Ia Bill-ko ta·rake Governor ra·chakchina gita chinga darangnaba u·iatgija kamko ka·na nangao ga·akaha maina iani bidingo nangana batpile politics kal·aniko nikna man·engachim. Uni gimin chinga ia kamko politics-o nangatena sikjae, ian jatni nangchongmotgipa kam ong·a ine nike, ma·mongni dilgiparang baksa agangrikataha. Ia kam da·alo chu·sokgipa ong·na man·ahani gimin anga dingtangmancha Nokgipa Isolko aro jat gimikkon mittelna ska,” ine Marak parakataha.
Ia kamko chu·sokatna krenganio mitam dilgiparang rim·ako man·aha aro mitamrang saknaanirangko chakna nangaha indiba bon·kamao Nokgipa Isolni ka·saanichi A·chik jat chegipa ong·aha ineba Tura MDC parakataha.