SHILLONG: Garo Hills Autonomous District Council (GHADC) election-o susagipa candidate-rangna Scheduled Tribe (ST) certificate-ko nangtelgipa ong·atna pass ka·gipa niamko Mongolbar salo, a·dokni Governor CH Vijayashankar ra·chakangani ja·man, GHADC-na dingtang electoral roll-ko tarina a·dok sorkari ku·rachakaniko on·angaha.
Iani bidingo kobor ra·timgipa manderangna talataniko on·angengon, GHADC-o Tribal ong·gijagipa manderangni bak ra·paaniko champengna niamko tariahani gimin Khasi Hills Autonomous District Council (KHADC) aro Jaintia Hills Autonomous District Council (JHADC)-oba an·tangtangni niamrangko tarichina sorkari seachi u·iatgen ine a·dokni Deputy Chief Minister aro District Council Affairs (DCA) Minister Prestone Tynsong parakataha.
Tynsong-ni parakatani gitade, GHADC election-o susagiparangna ST certificate-ko nangtelgipa ong·atna taridapgimin niamko a·dokni Governor ra·chakahaoba, GHADC-ni term-ko jadokna ra·dodapanikode sorkari ra·pilkujawa.
“Sixth Schedule-ni Rule 8-ko GHADC-ni taridape pass ka·aniko ra·chakahani gimin chinga a·dokni Governor-ko mittelna ska. Ia Bill-ko da·alo Governor ra·chakahani gimin da·o ian Act ba niamo ong·aha,” ine Tynsong aganaha.
GHADC election-o Tribal ong·gijagipa manderangni bak ra·aniko champengahani gimin da·o electoral roll-rangkoba sorkari gital dake nipilanggnok ineba DCA Minister ku·rachakaniko on·angaha.
“GHADC-o gital niamko ra·gatahani gimin electoral roll-rangkoba nipiltaina nangao ga·akengaha. Budbar salo anga department baksa tom·e chanchirimangtaigen aro nangani kri GHADC-na ge·etanirangko on·anggen,” ine Tynsong parakataha.
KHADC aro JHADC-ode electoral roll-rango Tribal-rangkosan segataiani gimin GHADC-na dingtang electoral roll-ko taritaina nanggnok ineba a·dokni Deputy Chief Minister aro DCA Minister parakataha.
“GHADC-o gital niamko ra·gatahani gimin KHADC aro JHADC-o ja·rikgipa apsan niamkon GHADC-oba ja·rikna nanggnok,” ine ua aganaha.
KHADC aro JHADC-oba an·tangtangna niamrangko tarichina sorkari u·iatgen ine janapatengon, “AD Rules-ni Clause 8-ko taridape, Governor-na ra·chakchina watatna chinga KHADC aro JHADC-na sedoatgen,” ine Tynsong aganaha.
Garo Hills-o so·sojengjeng ong·anina GHADC election-ko ra·doatna nangahaoba da·o tom·tomanirangko man·piltaiengaha ineba Deputy Chief Minister parakataha.
“GHADC-o AD Rules-ko taridapahani gimin da·o Garo Hills-ni manderang kusi ong·aha aro da·o tom·tomaniko man·pilengaha,” ine Tynsong aganaha.
