AMPATI: South West Garo Hills a·jao LPG, petrol aro diesel-ko on·anio, neng·nikanirangko man·enggipa manderangna Deputy Commissioner (Supply)-ni office, dingtangmancha +91 7005926621 helpline nombor-ko a·bachengataha.
Da·o dipet South West Garo Hills a·jao chu·onga gitan LPG, petrol aro diesel-rang donga ine u·iatengon, manderangko kenjagokjachina, tol·gipa koborrangko giproroatjachina aro pangchakani grigipa koborrangko bebera·jachina gita DC (Supply), a·jani manderangko didiataha.
South West Garo Hills a·jani badiaba biaprango, LPG, petrol aro diesel-rangko man·jaengani gimin badi ka·na, sing·sandina ba report ka·na gita on·gimin helpline nomborko jakkalna man·gen ineba DC (Supply) u·iataha.
