Shillong: Sonibar salo Meghalaya Legislative Assembly Annexe Hall, Rilbong-o Viksit Bharat Youth Parliament Festival-ko My Bharat Meghalaya name dake ong·atna man·aha, ian a·dok gimikoni dambe dilgiprarang aro niam riti tarigiparangko apsan rimbachimongani ong·a.
“Union Budget 2026: Strengthening the Indian Youth’s Path towards Viksit Bharat 2047,” pangchakanio mongsongbate festival-o bakko ra·giparang bilakgipa changa sapanirangko agan-talatangaha aro uamangni community-rango neng·nikgipa mamlarango ning·tue chanchian baksa bakko ra·angaha.
Nambatgipa sak 5 susagiparangko seokangaha, Riwaka Tangsong aro Rabeclyne Kharbyngar (East Khasi Hills), Sengrimchi Marak (East Garo Hills), Pynhiammiki Ryngksai (East Khasi Hills), aro Riakor Lyngdoh Nonglait (Eastern West Khasi Hills). Ia chegiparang mikkang jao New Delhi-o National Level Youth Parliament-o Meghalaya-ni pal ong·e bakko ra·anggen.
Chadamberangni gisepgriko katta agananirangko, dilgipa ong.aniko aro songsalo bak ra·aniko bilakdapatna miksonge iako ong·ataha, uamangni chanchianirangko ku·rang ong·a aro a·songko rikanio on·gilna ian uamangna on·enggipa chol ong·a.
Oprakani session-o mongsonggipa sokgipa aro Ampati-ni MLA Smti. Miami D Shira aganaha, chadambe dilgiparangko mikkangchina uamangko tarianio indakgipa cholrang namen gamchata ine ua aganaha.
“Matchotani salo, jedakgipa neng·nikarang sokbao darangna bateba rakbate aganbo jekon na·a tariaha ba aganna tariaha,” ine ua aganaha.
Indakgipa ranta ka·atanirangara dambe manderangko legislator-rangni kam ka·aniko aro ain-rangko tariangni ja·dil ja·pangrangko ma·siangna dakchaka ine ua kan·dike agandapangaha.
“Ian namen gamchatgipa ranta ka·ani ong·a jeon dingtang dingtang kam ka·anirangko aro gadangrangko ma·siangna man·a jekon chinga da·o dakenga,” ine ua agandapangaha.
Mawphlang-ni MLA Shri Matthew Beyondstar Burbah-ba mongsonggipa sokgipa gamchatbatgipa cholrangko ong·katatna chadamberangko didiangaha, indakgipa cholrang ka·donganiko ong·katata aro changa sapaniko baikamata ine ua aganaha.
“Na·simang gimikande politician ong·janaba donga indiba bang·a gadangrango na·aba aganangna man·gen. Iano skie ra·aniko man·haode ian nang baksa pangnan dongkamgen,” ine ua aganaha.
Viksit Bharat Youth Parliament Festival 2026-ko India sorkarini Ministry of Youth Affairs and Sports-ni ning·o a·bachengataha, ian a·songko rikanio gisiko nanggipa stakeholder ong·e chadamberangko bilakatna on·kanggipa ong·a, ine Smt. Linda B.K. Sangma, Director, My Bharat Meghalaya aganaha.
Gipin dongpagipa dilgiparangara, Shri Malthus S. Sangma, Secretary, Meghalaya Legislative Assembly; Dr. Andrew Simons, Adviser (Legislation) Meghalaya Legislative Assembly; Shri Bobby Wahlang, State Youth Officer, Meghalaya sorkarini Sports and Youth Affairs department, Government of Meghalaya; aro F. Rumnong, NSS State Nodal Officer.
