SHILLONG: Meghalaya a·dokni Umiam Lake-o donggipa Lumpongdeng Island-o five-star luxury hotel aro spa kulina gita sorkarini tik ka·aniko Meghalaya Pradesh Mahila Congress (MPMC) aro Green-Tech Foundation (GTF) Meghalaya raken jegalataha aro ia chichango five-star hotel-ko kulianiara, samtangtango ong·telaigiparangna nangchakeaniko ra·bagen ine mikrakataniko on·angaha.
Umiam Lake-o five-star hotel aro spa kulina sorkarini tik ka·aniko jegalatengon, ia chichangara samtangtango ong·telaigiparangna namen mongsonggipa biap ong·a aro ia chichangni acre 66 ong·gipa a·ako five star hotel kulina on·genchimode, ian a·doko damsa gamchatbatstanggipa biapko nisigalani gita ong·gen ine MPMC-ni president Joplyn Scott Shylla parakataha.
“Umiam Lake-ara a·dokna chirangko on·anio mongsonggipa warisan ong·ja indiba Meghalaya a·doko ong·telaigipa biaprangoni damsa nitobatsranggipa aro samtangtango dongtoaniko on·gipaba ong·a. Ia biapo iandake dal·begipa hotel aro spa-ko kuligenchimode ian a·doko gamchatbatsranggipa wariko nisigalani ong·gen,” ine Shylla parakataha.
Ia Umiam Lake-o nokrangko rikgenchimode aro bading chiwalani kamrangko ka·genchimode ian ong·telaigipa biaprango nosto ka·an baksana chirangko moila ka·e manderangni janggi tanganio neng·nikanirangko ra·bana man·aigen ineba MPMC parakataha.
“Uni gimin samtangtango ong·telaigiparangko nisie galani aro ia chichang samba jolrango songdongenggipa manderangni janggi tanganiko nisie galna gita ia biapo five-star hotel rikaniko chinga raken jegalenga,” ine Shylla parakataha.
Ia biapo five-star hotel kulina tik ka·aniko ra·pilchina aro ia jolrangko ripinge rakkina gita ja·kurangko de·china gitaba ua a·dok sorkariko didiataha.
Apsan daken a·dokni Green-Tech Foundation (GTF) dolba ia Umiam Lake-o five-star hotel aro spa-ko rikna gita acre 66 ong·gipa a·arangko Indian Hotels Company Limited (IHCL)-na on·na tik ka·aniko jegalataha aro ia project-ko den·galpilchina gita a·dok sorkariko didiataha.
Ia chichango five-star hotel rikna tik ka·aniko jegalatengon, ian Umiam Lake-ko aro mongsongbate Lumpongdeng Island-ko nisie galani ong·gen ine GTF-ni chairman H Bansiewdor Nonglang parakataha.
Ia biapo five-star hotel-ko rikaniara Umiam dam-na nangchakeaniko ra·bagen ine mikrakataniko on·angengon, ian a·doko 176 MW ong·e dal·batsranggipa hydroelectric project ong·ani gimin mikkangchi bang·en neng·nikanirangko chagrongna nangani cholrang donga ine Nonglang parakataha.
“Sohra, New Shillong ba Tura gita dakgipa biaprango tourism project-rangko ra·baanikode chinga jegaljaenga indiba Umiam gita dakgipa biapo five-star hotel rikanikode chinga raken jegalaigen,” ine Nonglang parakataha.
Ia project-na no-objection certificate (NOC)-ko on·jachina gita uamang, Khasi Hills Autonomous District Council (KHADC)-na sedoataha ineba GTF-ni chairman parakataha.
