TURA: Chatro chatrirang, mongsongbate songadam nokadamrango Mathematics subject-o chu·sokna man·rongjaengani gimin kolgapgijanirangko kolgapatna gita Sombar salo, Tura Don Bosco College-ni ning·o donggipa Mathematics Department, International Mathematics Day-ko maniani bak gita intra-departmental seminar presentation aro inter-school quiz competition-ko ong·atangaha.
International Mathematics Day-ko a·gilsak gimikon March-ni 14 tariko manironga indiba dingtang dingtang a·selrangchi ua salo manina man·jahani gimin ia program-ko March-ni 30 tariko ong·atangskaaha ine u·iataha.
Ia program-ko Department-ni Head Habul Das dilangaha aro Nenzebi Ch Sanngma, dakchake on·angskaaha.
Seminar-ko ong·atanio, college-o poraienggipa chatro chatrirang, Mathematics-ni bidingo dakmesokan baksana agan-talatanirangko on·angaha.
Quiz competition-ko ong·atanio Tura Public School, Sherwood School, St. Mary’s School, St. Xavier’s School, aro Don Bosco School bak ra·angskaaha aro ia susaanio Tura Public School skanggipa boksisko man·e, Sherwood School gnigipa boksisko man·skaaha.
Ia program-ko ong·atanio, St Xavier’s School-ni skigipa, Mathematics Department-ni Head aro coordinator-ba jinmana aganprakengon, Mathematics subject-ko ka·donge ra·china gita didiani kattarangko aganangaha.
Ia program-o Tura Don Bosco College-ni Principal Fr Januarius S Sangma-ba jinmana aganprakengon, Mathematics subject-o gisik nanggiparang ong·china aro kenjachina gita agan-ku·pattianirangko on·angaha.
