Chokpot jolrango rama jal·lang namjae neng·nikaniko man·enga: GSU

TURA: South Garo Hills a·jani Chokpot jolrango rama jal·langrang namjani a·sel da·o gita wachini somoirango, manderang neng·nikanirangko chagrongna nangrongenga ine Garo Students Union (GSU) Chokpot regional unit parakataha.
GSU Chokpot regional unit-ni general secretary Spensar R Sangma-ni u·iatani gitade, Chokpot jolrango donggipa rama jal·langrangko sorkari, tarie on·na gisiko nangjaengani a·selan da·o gita wachini somoirango, skulrangchi re·enggipa bi·sarang aro dingtang dingtang nanga kamna re·ruraenggipa manderang pilakan neng·nikanirangko chagrongna nangtokenga.
“Re·anggipa March-ni 31 tarik Mongolbar saloba, Chokpot-oni Gasuapara-ona dakanggipa ramao dolong dongjani a·sel re·ruraenggipa manderang, an·tangtangan bike-rangko jinma chilbate ra·angna nangako nikna man·aha. Ian 59-Chokpot constituency-ni ning·o man·gopgipa biaprangan ong·achim indiba Chokpot-ni MLA Sengchim N Sangma, rama jal·langrangko nirok sandia dongjaenga,” ine GSU Chokpot unit-ni general secretary parakataha.
2023 aro 2025 bilsirango Chokpot jolrango songdongenggipa manderangni neng·nikanirangko man·engani gimin a·dokni skotong minister Conrad K Sangma-na memorandum seachi u·iatahachim indiba da·onan manderangni neng·nikanirangko mingsaba namate on·a dongkujaenga ineba GSU Chokpot unit-ni general secretary matnangataha.
GSU-ni parakatani gitade, Chokpot Sangknigre sambao donggipa Dankipara-oni Balikimgre, Rongjugre-ona hanging bridge kabatgipaba da·o namsrangjahani a·sel, songni nokni manderang, mongsongbate skul aro college-rangchi re·enggipa chatro chatrirang, neng·nikanirangko chagrongna nangtokenga.
“Ia jal·langko songni nokni manderang an·tangtangsa, skulrangchi re·enggipa bi·sarangna wachini somoirango chi ga·bate re·na gitasa tarie on·aha indiba ia jal·langko da·onan sorkarini gitade maming tarie on·na dongkuja. Ian Chief Minister Conrad K Sangma-ni jikgipa Mehtab Chandee A Sangma-ni Gambegre constituency ning·o man·gipa biaprang ong·skaachim,” ine GSU Chokpot regional unit-ni general secretary Spensar R Sangma parakataha.
Baromile-oni Chokpot-ona tarienggipa ramakoba Baromile-oni Sandong Songmaonasan tarie donengkuani a·sel salanti kam nangana re·ruraenggipa manderang neng·nikanirangko chagrongna nangtokenga ine janapatengon, Sandong-oni Chokpot Bazar-ona tarina nangkuenggipa rama tong·sakora  maina donchipaha ine Sangma sing·doatenba, iani bidingo talataniko on·china Chief Minister-o dabiangaha.
Chokpot-oni Karukol-ona rama tarina gita kror 156 tangkarangko sanction ka·gipani giminba maming kobor dongchipjaengaha ineba GSU Chokpot regional unit matnangataha.