SHILLONG: Meghalaya a·doko Domestic ba noko jakkalgipa LPG cylinder-rang chu·ongjaenga inako Food, Civil Supplies & Consumer Affairs department-ni official-rang jegaltokengon, a·doko domestic LPG cylinder-rangba adita chu·onggijanirang donga ine a·dokni Chief Minister Conrad K Sangma, Budbar salo parakatskaaha.
Iani bidingo kobor ra·timgipa manderang baksa agangrikengon, a·doko LPG cylinder-rang bang·a bang·ja chu·ongjaengoba a·dok sorkari, manderangna LPG-rangko nanga gitan on·na jotton ka·enga ine Sangma parakataha.
“Domestic LPG-rangba chu·ongade ong·jaenga indiba inditana ong·kuja,” ine Chief Minister aganaha.
A·doko domestic LPG cylinder-rang chu·ongjaenga inako batanggimin somoirango Food, Civil Supplies & Consumer Affairs department-ni officer-rang jegalatenba, da·o dipet a·doko domestic LPG-rangde chu·onga gitan donga ine a·kangatahachim.
Commercial ba hotel, restaurant aro uandakgipa cha·ani dokkanrango jakkalgipa LPG-ni bidingo janapatskaengon, a·song gimikon commercial LPG-rangde chu·ongjaenga ine Chief Minister parakataha.
Commercial LPG cylinder-rangko ma·mong sorkari, 20 percent-oniko 70 percent-ona bariataha ine parakatengon, commercial LPG-rangko bariatanio nangchakeanikode bang·e ma·sitokkujaenga ine Sangma aganaha.
“Re·baenggipa sal somoirangode commercial LPG cylinder-rangkoba skango gitan man·na ka·dongenga,” ine ua aganaha.
LPG-rangoni 90 percent-kode a·songni bijangchi salaram jolrangonikosa Strait of Hormuz gita ra·baenga ine talataniko on·angengon, LPG-rang chu·ongjani a·sel manderangni neng·nikanirangko komiatna gita ma·mong sorkari, cholrangko sandienga ine Chief Minister parakataha.
