SHILLONG: Meghalaya a·doko electoral roll-rangko Special Intensive Revision (SIR) dakchina a·dokni Chief Minister Conrad K Sangma-ba nangnikenga ine aganahani gimin Confederation of Meghalaya Social Organisations (CoMSO) mittelpilaniko parakataha indiba ja·ku de·ani gri ku·rachakmangmangaianikode uamang nangnikjaenga ine parakatskaaha.
Adita salrangna skang, BJP-ni state president Rikman Momin-ko grongeani ja·man kobor ra·timgipa manderang baksa agangrikengon, a·doko ta·raken SIR-ko dakna gita a·dok sorkari ja·kurangko de·na ka·dongsoenga ine CoMSO-ni chairman Roy Kupar Synrem parakataha.
“SIR-ni bidingo Chief Minister-ba nangnikpaaniko parakahani gimin chinga uko mittelpilna ska indiba iani bidingo ku·rang on·mangmange donganikode chinga nangnikja aro kamko chu·sokatchinasa chinga nangnikenga,” ine Synrem aganaha.
SIR-ko ta·raken a·bachengatna gita iani bidingo, ma·mong sorkari aro Election Commissioon of India (ECI) baksa agangrikchinaba ua a·dok sorkariko didiataha.
Synrem-ni parakatani gitade, SIR-ko dakna nangengani gimin CoMSO, a·doko donggipa pilak political party-rangkon gronge agangrikna miksongenga.
“Seokako man·gipa dilgiparang ong·e, political party-rang, iano dal·bea daitorang donga. Iani bidingo a·dok aro ma·mong sorkarirang baksa agangrikna ja·kurangko de·china chinga uamangko didienga,” ine CoMSO chairman aganaha.
BJP-ni state president aro gipin dilgiparangko gronganio CoMSO-ni dilgiparang, SIR-ko ra·gatchina aro Scheduled Tribe (ST) Order-ko taridapchina didie segipa lekkako on·angaha ineba Synrem parakataha.
Synrem-ni parakatani gitade, SIR-ko ta·raken a·bachengchina uamang nangnikenga aro iani bidingo dingtang dingtang dilgiparang baksa agangrikgen ine BJP-ni dilgiparang, uamangna ku·rachakaniko on·ataha.
ST Order-ko taridapna nangengani gimin janapatengon, sorkarini songe on·gipa committee-rangko chalaianio ja·manchakrongenga ine CoMSO-ni chairman, suk ong·gijaniko parakataha.
ST Order-ko taridapna songgipa committee-ni bidingo janapatengon, iako name am·sandina gita 2024 bilsini December jaon working group committee-ko songahachim indiba da·alonan ia committee-ni kamrangko nikna man·kujaenga ine Synrem parakataha.
“Songe on·gipa committee-rang, dongimin somoi gitan kamrangko matchotate on·na nanga. Ian a·dokna nangchongmotgipa kamrang ong·a aro iandakgipa kamrango ru·utatchae dongakode ra·chakna man·jawa,” ine CoMSO-ni chairman parakataha.
