AMPATI: Special Rural Works Program (SRWP) aro MGNREGA-ni ning·o, South West Garo Hills a·jani Mangsanggre songo gital rikgipa dolongko Bristibar salo, Ampati constituency-ni MLA Miani D Shira, oprake on·angaha aro ia dolongko oprake on·anganio, South West Garo Hills a·jani Deputy Commissioner Anendya Raajsshre, Betasing C&RD Block-ni Block Development Officer Crystal RN Sangma, dingtang dingtang official-rang aro songni manderangba dongpae bak ra·angtokaha.
Ia gital dolongko oprake on·anganio Ampati MLA Miani D Shira, jinmana aganprakengon, ia dolongko rikaniara namen dal·begipa kam ong·ani gimin ua MLA saksanchide ia dolongna tangka paisarangko chamsokjaengachim indiba Mangsanggre songni manderang, ia songo dolongko nangtelenga ine aganahani gimin ua jedakeba, ia dolongko rike on·na cholko man·aha ine parakataha.
Ia dolongko SRWP aro MGNREGA-ni ning·o nangrime rikahani gimin ian sorkarini dingtang dingtang scheme aro department-rangchi nangrime rikna gita gipin songrangnaba dakmesokani ong·aha ineba Shira aganaha.
Iana skang, South West Garo Hills a·jani Deputy Commissioner Anendya Raajsshre-ba jinmana aganprakengon, songni nanganirangko chu·sokate on·ahani aro ia kamko chu·sokatanio BDO aro songni manderangna pilak nanga dakchakanirangko on·ahani gimin Ampati MLA-ko mittelpilangaha.
Namroro silroroani kamrangko ka·anio sorkari baksa songni manderangba bakrimna nanga ine janapatengon, mikkangchiba sorkarini dakchakanichi nangrime ka·gipa project-rangko jako ra·angkuchina gita Deputy Commissioner, songni manderangko didiangaha.
Ia dolongko donsogimin somoina bilsisa skangan matchotaha aro iana South West Garo Hills a·jani Deputy Commissioner, an·tangni kusi ong·aniko parakangaha.
