TURA: Garo Hills Autonomous District Council (GHADC)-ni ning·o Sixth Schedule a·jao ga·akgipa pilak songrangkon A·chik bimingchi mingchina gita Niksamso Garo Community Organisation (NGCO) dabiangaha.
NGCO-ni parakatani gitade, Garo Hills-ara ramram biapsan ong·aija indiba A·chikrangni man·e cha·begipa daka rikani, man·rikani aro Tribal ong·aniko mesokanisa ong·a. Indake ong·genchimoba, Garo Hills-ni bang·a songrangkon, mongsongbate a·kawe jolrango A·chik a·songna kragijagipa bimingrangchisa songni bimingrangko mingtokaha.
Garo Hills-o gipin ku·sikrangchi biming minggipa biaprangko janapatengon, Tura-ni Araimile, Dermile, Baromile, Phulbari, Selsella, Baitbari, Gimaijhora, Miljumla, Batabari, Balachanda, Bajengdoba, Holdibari aro uandakgipa bang·a biaprangkon gipin ku·sikrangchisa biming mingaha ine NGCO parakatenba, ia pilak biaprangkon A·chik bimingchi mingsrechina gita dabiangaha.
“Ia biaprangara Garo Hills-ni ning·o Sixth Schedule a·jao ga·akgipa biaprangan ong·genchimoba, gipin ku·sikrangchisa biming mingahani gimin A·chik a·songni biaprangna kraja,” ine NGCO parakatenba, Garo Hills-o gipin ku·sikrangchi biming minggipa pilak biaprangkon sandie, A·chikkuchi mingsrechina gita GHADC-ko didiataha.
