Umiam-o kulina miksongenggipa project-rangko name nipilchina BJP didia

SHILLONG: Ri Bhoi a·jani Umiam Lake-o dal·dalgipa project-rang, chong·motan five-star hotel gita dakgipa project-rangko kulina gita sorkarini miksonganiko dingtang dingtang dolrang jegaltokengon, ia Umiam Lake-ara a·dokna damsa nitogipa chibolsan ong·aigija Meghalaya a·doko mingsa jatni gam-jin gitaba ong·enga ine Bristibar salo, BJP-na ku·wattimgipa Mariahom Kharkrang parakatenba, ia biapo kulina miksongenggipa project-rangko name nipilchina, sorkarini a·arangko rakkichina aro namroro silroroaniko ra·baanio joltangni manderangnan namgniko on·china a·dok sorkariko didiataha.
“Lumpongdeng Island-o Taj Resort aro Spa kulina miksonganiko jegalaniara, samtangtango ong·telaigiparangna kenchakana baten ning·tubatgipa a·selrang donga. Samtangtango ong·telaigipa gita niatgenchimode Umiam Lake-ara nitobegipa biapmangmangsan ong·aija indiba ian samtangtango ong·telaigipa aro Meghalaya a·doko mingsa jatni gam-jin gitan ong·enga,” ine Kharkrang aganaha.
Kharkrang-ni aganani gitade, a·doko tourism-ko namdapatna nangengoba, iandakgipa project-rangko ra·gatna skang, samtangtango ong·telaigiparangna nangchakeani dongama dongjawa, uko sorkari name nichengna nangchongmota.
“Iandakgipa project-rangchi, samtangtango ong·telaigiparangko nisianisa ong·genchimode ian ja·mano Meghalaya a·dokna aro a·dokni manderangna nangchakeanirangko ra·bagen,” ine BJP-ni dilgipa aganaha.
A·doko dingtang dingtang project-rangko ra·gatengani a·sel sorkarini a·arang gimaroroangengaha ineba Kharkrang parakataha.
“A·doko kulienggipa project-rang bang·en donga aro ia pilak project-rangan sorkarini a·arango ong·ani gimin sorkarini a·arang ta·raken gimaroroangengaha,” ine ua aganaha.
A·doko dal·dalgipa project-rangko private a·arango kulina gita a·a nokgiparang baksa bakrimchina gita didiatengon, iandakgipa project-rangko private a·arango kuligenchimode sorkarini a·arangko donskae, ja·man power plant aro uandakgipa nangchongmotgipa project-rangna jakkalskana man·gen ine Kharkrang parakataha.
Dal·dalgipa project-rangko gipin biaprangoni company-rangna rikna kamrangko on·engon, labour aro uandakgipa chonchongipa kamrangnade a·doktangni manderangkon jakkalna nanga ineba BJP-ni dilgipa, ku·pattianiko on·angaha.