TURA: Garobadha-oni Selsella-ona dakanggipa ramako name tarichina changni chang u·iatahaoba kamrangko nirokna gisik nangjaenga ine Selsella jolo dingtang dingtang dolrangni nangrime bikotgipa All Selsella NGOs Alliance (ASNA) parakatenba, Garobadha PWD (Roads) Sub-Division-ni Sub-Divisional Officer (SDO) salsnini gisepon ra·galchina a·dok sorkario dabiangaha.
Selsella NGO-rangni a·dokni Chief Minister Conrad K Sangma-na sedoatgipa chittio parakatani gitade, Garobadha-Selsella ramako changgnina kingking tariahachim indiba kamrangko name ka·jani a·sel jasani gisepon ramarang nosto ong·na a·bachengpiltaiahachim.
“Garobadha-Selsella rama namjani a·selan Selsella jolrango songdongenggipa manderang neng·nikanirangko chagrongna nangtokenga. Ia ramako taripile on·china chinga chinga changni chang PWD office-na u·iatahaoba chingni mol·molanirangko knachakna gisik nangjaenga,” ine Selsella-ni NGO-rang parakataha.
NGO-rangni parakatani gitade, Garobadha-oni Selsella-ona dakanggipa rama changni chang nosto ong·pilengoba Garobadha PWD (Roads)-ni SDO, ramarangko namdapatna maming kamrangko ka·jaha aro ian uni manderangna aro manderangni neng·nikanirangna simsakgijaniko mesokani ong·a.
“Da·o ia rama namsrangjahani a·sel sagiparangko ra·ruraanio, chatro chatrirangni salanti re·ruraanio aro bading chiwalgiparangni kamrango neng·nikanirangko chagrongna nangtokenga,” ine Selsella-ni NGO-rang parakatenba, Garobadha PWD (Roads)-ni SDO-ko salsnini gisepon kamoniko ra·galchina Chief Minister-ko didiataha aro ia salsnini gisepo ia official-ko kamoniko ra·galjagenchimode jingjengatanirangko dakna draatako man·gen ine parakataha.
Ia All Selsella NGOs Alliance-o Selsella-ni GSU, FKJGP, ADE, ASWA, NGCO aro ANYO dolrang bakrimengachim ine nikna man·a
