TURA: Bugi chibimako kabatgipa Sonagre-Jijikapara Road Bridge-ko Sukrobar salo, a·dokni Chief Minister Conrad K Sangma, oprake on·angenba, Kujikura-oni Dimapara-ona apalbatate tarina sienggipa ramako tarinaba a·bachengate on·angjolaha.
Ia dolongko oprake on·anganio a·dokni Chief Minister, jinmana aganprakangengon, ia jolrango rama jal·langrang dongjani a·sel songni nokni manderang, ru·utbea bilsirangna neng·nikanirangko chagrongna nangaha indiba da·alo ia dolongko rike on·anichi, songni nokni manderang re·a doanio namgnirangko man·gnok ine parakataha.
“Ia dolongara jolo songdongenggipa manderangna namen nangchongmotgipa ong·a maina manderang ru·utbea bilsirangna ia chibimako ga·batna aro chibimao paksao donggipa biaprangona re·ruraanirango namen neng·nikanirangko chagrongna nangengachim,” ine Sangma aganaha.
Meghalaya a·doko rama jal·langrangko namdapatna sorkarini ka·enggipa kamrangni gimin janapangengon, batanggimin bilsichetni gisepo a·dok sorkari, rama jal·langrangko namdapatna gita bang·en tangka paisarangko koros ka·aha ine Chief Minister parakataha.
A·doko iandakgipa mongsonggipa project-rangko a·dok sorkari, ma·mong sorkari aro dingtang dingtang agency-rang baksa bakrime chu·sokatna man·enga ineba Sangma aganaha.
Bugi chibimani kosako ia metre 90 ong·e bakrogipa dolongko, World Bank-chi dakchakenggipa Meghalaya Integrated Transport Project (MITP)-ni ning·o, gong lak 1,499.95 koros ong·e rikaha.
Ia dolongko rikanichi ian West Garo Hills a·jani ning·o donggipa Sonagre, Chandapara, Jijikapara, Abeagre, Awalgre, aro A·simgre songrang baksana South Garo Hills a·jani Megua Songmong, Megua A·bagre, Ruga Doldoma, Ruga Songmong, Chokpot, aro Dimapara songrangna namgni ong·gnok.
Kujikura-Dimapara ramako apalbatate tarina kamko a·bachengate on·angjola
Date:
Share post:
