SGH-ona maming lekka gri re·napbaenggiparangko champengjaenga ine matnanga

BAGHMARA: South Garo Hills a·jao kamrangko ka·e cha·na aro bading chiwalna gita dingtang dingtang biaprangoni manderang, maming lekka gri re·napbana man·engani gimin social activist Nilbath Marak, a·dok sorkariko aro iandakgipa manderangko nokchakenggiparangkoba sing·doataha.
Marak-ni u·iatani gitade, adita salrangna skang ua Nongalbibra jolrangona re·angon, ia biaprangona gipin biaprangoni manderang re·bae kamrangko ka·e cha·enga aro bading chiwalenga ine nikna man·aha. Iandakgipa manderangko ua sing·sandion, uamangoni bang·batan labour licence, trading licence gita dakgipa lekkarangko mesokna man·jaha ineba Marak parakataha.
Batanggimin March jao, Garo Hills-o so·sojengjeng ong·angani ja·man West Garo Hills a·jaona, kamrangko ka·e cha·na aro bading chiwale cha·na re·baenggipa manderangko champengna gita rakgipa niamrangko donangahachim ine nikna man·a. Adita salrangna skang, West Garo Hills a·jani district administration, dingtang dingtang dolrang, mondoliko dilgiparang, songko nokko dilgiparang aro ja·delgimin manderang baksa tom·e chanchirimangenba, gipin biaprangoni re·baenggipa manderangko nirokna gita rakgipa niamrangko ra·gatangahachim.
Garo Hills-ni gipin a·jarangoba, dingtang dingtang kamrangko ka·anio, mongsongbate rama jal·lang aro dingtang dingtang nokrangko rikanio, kam ka·giparang chu·ongjaengani gimin apsan dakgipa niamrangko ra·gatna miksongengachim.
“Adita salrangna skangsan Garo Hills-o namen andalbegipa somoiko an·ching nikna man·aha aro ia a·selni giminan, gipin biaprangoni kam ka·e cha·na aro bading chiwale cha·na re·baenggipa manderangko nambate nirokgnok ine ka·dongsoengachim. Indake ong·genchimoba, Sonibar salo angni Nongalbibra jolrangona re·ange nion, ua jolrango nangchongmotgipa lekkarang gri, kamrangko ka·e cha·na re·batokenga ine anga nikna man·aha. Bading chiwale cha·na re·bagipa mitam manderangba Trading licence-rang dongja ine anga nikna man·aha. Iani bidingo sandirokna nangchongmota. Garo Hills-o ong·anggipa obostako apsan dake ong·atpiltaina chinga nangnikjaenga,” ine Marak parakataha.
Dingtang dingtang biaprangoni Garo Hills-ona kamrangko ka·e cha·na aro bading chiwale cha·na re·baenggipa manderangko name nirok sandijaengani gimin ua district administration aro a·dok sorkarikoba matnangataha.