SHILLONG: Umiam Lake-ni Lumpongdeng Island-o Taj Resort Hotel aro Spa-ko kulina miksongenga ine a·dok sorkarini kosako dingtang dingtang dolrang jegaltokengon, ia jegalanio manderangni bakrimaniko ra·na gita Voice of the People’s Party (VPP), re·baenggipa April-ni 22 tariko Motphran-o jinma tom·bimonganiko ong·atna tik ka·angaha.
Ia jinma tom·aniko ong·atanio, Lumpongdeng Island-o Taj Resort Hotel aro Spa kulina miksonganiko jegalan baksana MPSC, DSC-rango ong·gija dakani, skigiparangna on·gimin bilrangko rakkijani aro sima jolrango songdongenggipa manderangna naljokanirangko on·jaengani giminba jinma chanchirimanggen ine u·iataha.
Iani bidingo, VPP-ni president Ardent Miller Basaiawmoit, Sonibar salo party-ni tom·aniko ong·atangani ja·man kobor ra·timgiparangna parakataha.
Lumpongdeng Island-o Taj Resort Hotel aro Spa-ko kulina gita a·dok sorkari, bilsi 60-na ia biaprangko gipin biapni company-na songgigrikenga ine matnangatengon, ia project-ko den·galpilna sorkarini nangnikjaenganiara, Khasi aro Jaintia manderangni kosako re·aniko mesokani ong·enga ine Basaiawmoit parakataha.
“Jatni namgnina ja·kurangko de·chakatani somoi ong·aha,” ine Basaiawmoit aganenba, sorkarini talate on·anirangna VPP, sengchae dongna man·jawaha ine parakataha.
Ia project-ko den·galpilchina dabie Green Tech Foundation-ni chairman, okumu chake jingjengatengon da·o dipet uni dabianiko sorkari chu·sokate on·kujaengani gimin VPP-ba ia jegalanio bakrimaniko on·pana tik ka·angaha.
Iani bidingo rakbate ja·kurangko de·na skang VPP-ni dilgiparang, ia antionin a·bachenge, a·dok gimiko awareness campaign-rangkoba ong·atna tik ka·enga.
Motphran-o ong·atenggipa tom·bimonganiona re·bae bak ra·echina gita Khasi aro Jaintia Hills jolrango songdongenggipa manderangko didiatengon, ia project-ko den·galpilna gita sorkari maming ja·kurangko de·ja ong·ode mikkangchi rakbate jingjengatanirangko dakanggen ine VPP president mikrakataniko on·angaha.
