SHILLONG: A·ning bite sandigipa manderang, adita salrangna skang, Garo Hills-oniko, ‘Calamaria garoensis’ minggipa rokomni chipuko nikaha ine kobor on·aha.
Iani bidingo, a·dokni Chief Minister Conrad K Sangma, research dakgipa dolni manderangna an·tangni namgipa skaniko on·atenba, gital rokomni chipuko nikaniara, a·doko donggipa buring bolgrimrangni gamchatgipa ong·aniko aro ong·telaigipa samtangtangni dingtanganiko mesokani ong·aha ine parakataha.
Research ba am·sandianiko, Help Earth, Cotton University, Assam Don Bosco University, Mizoram University, Zoological Survey of India, aro Indonesia a·songni National Research & Innovation Agency-ko man·chape dingtang dingtang dolrang dakangaha.
Am·sandigipa manderangni kamrangko mittelpilangengon, ia gital rokomni chipuko nikaniara, Meghalaya a·doko donggipa dingtang dingtang sam-bol aro matburingrangni mingnamaniko a·gilsak gimikna mesokani gita ong·aha ine ia jolrango a·ning bite am·sandianirangko dakangkuchina Chief Minister didiataha.
