BAGHMARA: South Garo Hills jolo mikka balwa ta·rakangtaianichi bang·a nokdangrang neng·nikaniko chagrongtaiaha. Koborko on·ani gitade South Garo Hills a·jani Siju Block-ni ning·o ga·akgipa dambonga songrang jean Eman Songmong, Eman-Warima, Prang A·ding, Do·ku A·we aro Eman-Gatabil ia songrango Mongolbar walni somaio mikka waa baksa ta·rakbegipa balwa balanganichi nok chi·bonga kolgrikmangni gita nokjamrang nosto ong·atako man·aha aro Warima-ode gilja nokrangba nosto ong·aha.
Unbaksa bagan barirang chu·gimik gita ong·na sipile noksan ong·atako man·aha aro rama jal·angrang nosto ong·aha jeon dal·dala bol pangrang be·dapanichi nangana re·ruraenggipa garirangna aro manderangnaba neng·nikaniko man·enga ine u·iataha. Unigimin neng·nikako man·enggipa nokdangrangna sorkarini gita maiba dakchakaniko on·chinaba mol·molataha.
Ia antini gisepon Garo Hills-ni dingtang dingtang biaprango mikka balwa aro still ga·akanganichi bang·a nok jamrang, ge·a gamani aro bagan barirang nosto ong·atako man·enganichi neng·nikaniko chagrongna nangenganiko nikna man·enga.
