Garo Hills-o kamrangko ka·na joltangni manderangkon jakkalchina Tura MDC didia

SHILLONG: Garo Hills-o ramarangko tarina aro dingtang dingtang nokrangko rikna labour ba kam ka·giparangko rakkiengon, 50 percent-kode joltangni manderangkon jakkalchina gita Robibar salo, Tura-ni MDC aro BJP-ni state vice president Bernard N Marak didiataha.
Marak-ni parakatani gitade, Garo Hills-o 80 percent-mangni gita chadamberang, kamgri ong·e dongenggiparang ong·a aro uamangoni 60 percent-mangni gitade, janggi tangani cholrang dongjae, poraiako dontonggiparang ong·ani gimin iandakgipa chadamberangnan, dingtang dingtang kamrangko ka·anio cholrangko on·na nangenga. Mongsonggipa scheme-rang, jekai Gati Shakti, PMGSY, JJM, PWD aro PHE-ni kamrangna bang·bata changon gipin biaprangoni re·bae kam ka·giparangnasa cholrangko on·rongbatenga ine janapatengon, gipin biaprangoni re·bae kam ka·e cha·enggipa manderangko iandakgipa mongsonggipa project-rango kam ka·atengani a·selan rama jal·langrang aro nokrang ta·raken nosto ong·pilrongaia ine Marak parakataha.
“Gipin biaprangoni re·bae kam ka·e cha·enggipa manderangna kamrangko on·chengrongani a·selan joltangni chadamberangde kamrangko ka·e cha·na cholko man·rongja,” ine Tura MDC parakataha.
Kamgri ong·e dongenggipa chadamberangni gisepo ding·chaoanirang batrorobaengaha ine janapatengon, iandake poraiako dontongna nanggipa chadamberangna hajira ka·e cha·ani cholrangko on·na gita ua dingtangmancha dakchakanirangko on·na miksongenga ine Marak parakataha.
Kam ka·e cha·enggipa chadamberangna night school aro online education-ko on·skana nangengani gimin janapatengon, iani bidingo ua education official-rang baksa chanchirimna a·bachengataha ine Marak parakataha.
Gipin biaprangoni re·baenggipa manderangko nirokna nangengani gimin janapatengon, niam gri bading chiwale cha·enggiparang aro licence gri hajira ka·e cha·enggipa manderangko Garo Hills-ona re·napbana on·jawa ine BJP-ni state vice president parakataha.
Iandakgipa manderangko nirokna gita GHADC-ni on·gipa ge·etani bidingo janapatengon, je manderangan gipin biaprangoniko labour-rangko rimnapbaengachim, uamangde skanggipa Nokmarangoniko No Objection Certificate (NOC)-rangko ra·chengna nanggen ine Marak parakataha.
Local MDC-rangoniko NOC aro recommendation-rangko ra·an baksana GHADC-oniko licence-na dorgasto galna nanggen ine u·iatengon, je contractor-rang ba nok nokgiparangan maming lekka gri, gipin biaprangoni labour-rangko nokchakengachim, uandakgipa manderangde Sixth Schedule-ni dongimin niamrango pangchake sastiko man·gen ine Tura MDC mikrakataniko on·angaha.
Garo Hills-o skilled aro unskilled labour-rang chu·onga gitan donga ine janapatengon, pilak kamrangon joltangni chadamberangna cholko on·chengna nangchongmota ine Marak parakataha.