SHILLONG: Garo Hills Autonomous District Council (GHADC)-ni constituency-rangko gital dake sima saltaina delimitation committee-ko songahani gimin ia committee-ni report-ko man·ani ja·mansa election-ko ong·atani giminde sorkari chanchigen ine Mongolbar salo, a·dokni Deputy Chief Minister, In-charge District Council Affairs (DCA) Prestone Tynsong parakataha.
“Delimitation committee-ko songahani gimin da·o ia committee, nanga gita kamrangko ka·engkua. Jensalo, ia committee-ni report-ko District Council-o pass ka·e, Governor ra·chakgen, uni ja·mansa GHADC election-ko ong·atani giminde chanchina man·gen,” ine Tynsong, kobor ra·timgiparangna aganaha.
Tynsong-ni aganani gitade, da·o dipet a·dok sorkari aro Governor-ba delimitation committee-ni report-na sengkuenga aro ia report-ko GHADC-o pass ka·e Governor-ona watatani ja·man ra·chakahaosa election-ko ong·atani bidingo sorkari chanchianggen.
“Da·o dipet GHADC-ni songe on·gipa delimitation committee, an·tangtangna tikatgimin kamko ka·engkua aro ia committee-ni report-ko Council-o pass ka·ani ja·man Governor-ona watatahaosa iako ra·chakna man·gen,” ine Deputy Chief Minister aro DCA Minister Tynsong aganaha.
Ia committee-na dongimin somoini bidingo sing·anina aganchakaniko on·angengon, “District Council-ni u·iataniko on·ani gitade, anga chanchia ia committee-na jagittam somoiko on·ahakon. Uni gimin ia committee, jagittamni gisepon kamrangko matchotatgen,” ine ua aganaha.
Delimitation Committee-ni final report-ko Council pass ka·chengna nanggen aro uni ja·man a·dokni Governor ra·chakahaosa election-ni kamrangkode a·bachengna man·gen ineba Tynsong parakataha.
Re·anggipa March jao Garo Hills-o so·sojengjeng ong·ahani gimin April-ni 10 tariko ong·atna tik ka·gipa GHADC election-ko sorkari dontongatenba, GHADC-ni term-ko jadokna ra·dodapatahachim.
Delimitation committee-ni report-ko man·ani ja·mansa GHADC election-ko tik ka·gen
Date:
Share post:
