DADENGGRE: West Garo Hills a·jani Dadenggre jolrango bijoliko wata tik ong·jaengani a·sel jolo songdongenggipa manderang, mongsongbate poraienggipa chatro chatrirang neng·nikanirangko chagrongna nangtokenga ine Dadenggre Progressive Students Association (DPSA) parakatenba, jolo songdongenggipa manderangna maming u·iatani gri, maini a·sel sal-wal chang 15-chang 20-mang ong·pile bijoli sirongenga ine sing·doataha.
DPSA-ni parakatani gitade, Dadenggre jolrango salantian chang 15-na baten bijoli sirongenga aro bijoli donggenchimoba basakobarangde voltage chu·ongskajani a·sel manderang neng·nikanirangko chagrongna nangtokenga.
“Ia jolrango bijoliko name man·jaengani a·selan kam ka·giparang, dingtang dingtang porikkarangko sena nangenggipa chatro chatrirang, pale sim·e cha·giparang, office-rango kam ka·giparang, sanna bananirangko on·enggiparang aro mongsongbate wal somoirango cha·ugiparangna kenchakna nangani ong·enga,” ine DPSA-ni vice president Chesrang Ch Marak parakatenba, ia jolrango bijoli on·aniko nirokatchina daito donggipa department-ko mol·molataha.
Mikkangchiba Dadenggre jolrango bijoli on·aniko namdapatjagenchimode ia jolrango donggipa dingtang dingtang songni Nokma-Sordarrang, NGO-rang aro jolo songdongenggipa manderang jinma tom·e chanchirimenba, rakgipa ja·kurangko de·na draatako man·gen ineba DPSA mikrakataniko on·angaha.
