RESUBELPARA: North Garo Hills-o Birth Cetificate tarianio ru·uta somairangko nangengani gimin, All A·chik Empowerment Organization (AAEO), Deputy Commissioner-na u·iataha.
Iani bidingo AAEO-ni President Bebeanriksim R Marak-ni aganani gitade, Dainadubi aro ua jolni wilwilao songdonggipa manderang Birth Certificate man·na gita jadokoni bilsisarangona kingking sengna nangenga, jeni a·selan chatro chatrirang uamangni school admission ka·anirango, MBOSE registration ka·anio aro Aadhar-na biming segatanirango ugita gipin kamrangko ka·anio neng·nikaniko man·enga ine Deputy Commissioner-na on·gipa chittio janapaha.
Meghalaya Right to Public Service Act, 2020-ni ning·o manderangna nanggipa certificate-rangko tarie on·anio sal 14-ni gisepon matchote on·a nanga ga·aka ine aganengon, North Garo Hills a·jaode niam gita ong·jaenga aro ian Indian Constitution-ni Article 21-koba pe·a ga·akenga. Una agreba ia kamko ka·enggipa staff chu·ongja baksana mikkang nitee kamrangko ka·enga jeon skanggipana tarie on·chenggija basakobade ja·mangipanasa skang tarie on·enga ineba Organisation matange aganaha.
Iandake kamrangko ka·angkuode a·jao songdonggiparang mikkangchiba apsandakgipa neng·nikanikon man·angkugen, unigimin iandakgipa kamrangko manderangna dangdike on·engon darangnaba maming mikkang niteani gri kamrangko ka·atchina gita organisation, AAEO district administration-ko didiaha.
NGH-o Birth Certificate man·ingjani a·sel neng·nikako chgrongenga
Date:
Share post:
