SHILLONG: Sukrobar salo, Labour Commissioner Office, Meghalaya Building & Other Construction Workers Welfare Board baksa nangrime, International Workers Day-ko Shillong songjinmani U Soso Tham Auditorium-o maniangaha aro ia salko manianio, a·dokni Chief Minister Conrad K Sangma, mongsonggipa sokgipa ong·e bak ra·angaha. Ia tom·anio, a·dokni Labour Minister Methodius Dkhar aro dingtang dingtang official-rangba dongpae bak ra·angaha.
Ia tom·anio, a·dokni Chief Minister, jinmana aganprakengon, ia salko ru·uta somoirangni ja·man manitaienga aro ian a·dokni krongrang gita ong·e, kam ka·e cha·enggipa manderangni salko maniani ong·a ine parakataha.
Ia salko manianio, Chief Minister-ni Labour Income Grant & Health Transformation (CM-LIGHT) scheme-koba Chief Minister a·bachengate on·angjolaha aro sak 11,000-na baten an·tangtangko sorkario biming segate kam ka·e cha·enggipa manderangna, kror 400-ni Labour cess fund-oniko sakprako gong 5000 ka·e tangkarangko chipe on·ataha.
Meghalaya a·doko gong kror 29,000-ni nok-jamrangko aro ramarangko tarina krenge kam ka·anichi, ming 20,000 kamrangko nakatate on·na man·aha ineba ia tom·anio Chief Minister parakataha.
CM-LIGHT scheme-ni bidingo talataniko on·angengon, sak 11,000-na baten sorkario biming segate kam ka·e cha·enggipa manderangna ia scheme-ni ning·o sorkari, sakprako gong 5000 ka·e tangkako on·enga aro ia salni gisepon ia tangkarangko uamangni bank account-rango chipataha ine Chief Minister parakataha.
“India a·song gimiko Meghalaya a·dokan, ta·rakbate economy-ni dal·roroanio gnigipa ong·enga aro a·dokni dal·roroaniko kim·kim ong·e 10 percent-o rakkina man·enganichi gong kror 29,000-ni ming 5000 dingtang dingtang kamrangko da·o ka·enga,” ine Chief Minister aganaha.
Salgro salaramni gipin a·dokrango, unskilled labour-rangna salprako gong 400 ka·e on·engon, Meghalaya a·dokode salprakon gong 525 ka·e on·skaengani gimin ian salgro salaram jolode bang·batgipa ong·enga aro India a·song gimiko gittamgipa ong·enga ineba Chief Minister parakataha.
Labour Cess-oniko a·dok sorkarini man·enggipa tangkarangara, gong kror 400-mangni gita ong·a ine janapatengon, “Ia labour cess-ara, nokrangko aro ramarangko tarianio koros ong·aoni 1 percent-ko ra·gipa kajina ong·a aro ia tangkarangkon, sorkario register ka·e kam ka·e cha·enggiparangna, an·seng baljokani, a·sel ong·ani somoirango, pension aro lekka porako on·na gita welfare board-rang koros ka·enga,” ine Sangma aganenba, a·doko hajira ka·e cha·enggipa pilak manderangkon, ia namgnirangko man·na gita sorkario biming segatchina didiangaha.
Ia program-ko ong·atanio a·dokni Chief Minister, Startup Toolkit Support Scheme aro gipin scheme-rangkoba kam ka·e cha·enggipa manderangni namgnina ra·gate on·angjolaha.
