CM-ni ku·chakaniko man·ahani gimin EPF-ko ta·rake on·china Muster Roll worker-rang dabia

SHILLONG: Meghalaya a·dokni Chief Minister Conrad K Sangma-ni ku·rachakaniko man·ahani gimin pilak muster roll worker-rangnan Employees’ Provident Fund (EPF)-ko ta·raken on·china Meghalaya Muster Roll Workers Union (MMRWU)-ni Joint Action Committee (JAC), pilak sorkari department-rangkon didiataha.
Muster roll aro salanti hajira ka·e cha·enggipa manderangna Variable Dearness Allowance (VDA)-ko bariatna tik ka·ahani gimin a·dok sorkariko mittelpilangengon, ian uamangni ru·uta somoirangna dabianiko chu·sokatani ong·aha ine JAC-ni adviser Khroo L Pariat parakataha.
“EPF-ko ja·rikahaode, kam ka·e cha·enggiparangba an·tangtangni officer-rangona re·ange sing·sandina nanga. EPF-ba pension-ni namgnirangko on·a,” ine Pariat aganaha.
EPF-ko ra·gatchina gita JAC, a·bachengon memorandum-ko on·ahachim ine janapatengon, sorkari department-rango, company-rango aro contractor-rangni ning·o hajira kam ka·e cha·enggiparangkoba EPF scheme-o napatna gita Chief Minister ku·rachakaniko on·aha ine Pariat parakataha.
Labour Commissioner-ba, dingtang dingtang department-rangna EPF-ko ra·gatchina seachi u·iataniko on·manaha ineba JAC-ni adviser aganaha.
Indake ong·engon, re·anggipa May-ni 1 tariko Chief Minister-ni parakataniara, uamangni indita bilsirangna dabianiko chu·sokatani ong·aha ineba Pariat parakataha.
Labour department-ni u·iatanikoba uamangni dol ra·chakaha ine janapatskaengon, indita bilsirangna muster roll worker-rangni dabianiko knachakaha ine Pariat, a·dokni Chief Minister-ko mittelpilangaha.
“A·dokni Chief Minister, kamchi aganchakaniko on·aha,” ine Pariat aganaha.
May-ni 11 tariko JAC-ni a·dok gimiko jingjengatna manchigiminko da·o uamang ra·galpilaha ineba Pariat aganaha.
“Chinga May-ni 11 tariko a·dok gimikon jingjengatanirangko dakna tik ka·ahachim indiba a·dokni Chief Minister aro sorkari chingni dabianiko knachakahani gimin chingni jingjengatna manchigiminko ra·galpilaha,” ine ua aganaha.