SHILLONG: Bilsi 15-na sorkariko chalaiani ja·man ia bilsini West Bengal Assembly election-o Trinamool Congress (TMC) amako man·ahaoba ia party, Meghalaya a·doko aro a·song gimikon bilgria ong·kuja ine TMC Meghalaya-ni dilgiparang a·kangataha.
TMC-ni state president aro Nongthymmai-ni MLA Charles Pyngrope-ni aganani gitade, West Bengal a·doko TMC sorkari ia chang amako man·ahaoba ian party bilgriaha ine mesoka ong·ja aro Meghalaya a·dokko man·chape a·songni pilak biaprangon TMC bilaken dongkuenga.
West Bengal Assembly election-o TMC, sorkariko rikna chu·onga gita seat-rangko chena man·jahaoba dam 80 seat-rangkode cheahani gimin party-ni bilakgipa ong·aniko mesokengkua aro dam 80 seat cheaniko bilgria ine agananide gualani ong·gen ineba Pyngrope aganaha.
TMC-ko bon·atsrangaha ine agananiara dal·bea gualani ong·a ine janapatengon, West Bengal-o TMC, bilsi 15-na sorkariko chalaiani ja·man da·o opposition-ona apjitatasan ong·aia ine Pyngrope parakataha.
Sorkariko chalaina chu·onga gita vote-rangko man·gijaniara party dongjaha ine miksonga ong·ja indiba pilak biaprangon TMC, bilaken kamko ka·engkua ineba TMC-ni state president aganaha.
Mikkangchi ja·ku de·na miksonganirangko janapatengon, ma·mongni dilgiparang baksa chanchirimani ja·man Meghalaya a·dokoba party-ni dilgiparang, nanga gita ja·kurangko de·anggen ine Pyngrope parakataha.
West Bengal a·doko amako man·anichi Meghalaya a·dokoba TMC-na nangchakeanirang donggenma ine sing·anina aganchakaniko on·angengon, Meghalaya a·doknade ian maming nangchakeaniko ra·bajawa maina election result-rangde pangnan indaken ong·aia ine Pyngrope aganaha.
West Bengal-o TMC-ni amako man·ahani gimin an·tangni chanchiako parakatengon, ia election-o party, raken kamko ka·ahachim indiba manderangni seokaniko pangnan ra·chakna aro mande ra·na nanga ine TMC-ni state president parakataha.
Ia chang West Bengal Assembly election-o Bharatiya Janata Party (BJP), bilsi 15-na chalaienggipa TMC sorkariko bon·chongdikatenba, a·songni jakgitelaniko man·chengaoni da·o skanggipa changna West Bengal-o sorkariko rikna chol man·ahachim.
