SHILLONG: Batanggimin sal somoirangonin, Opposition dol aro Trinamool Congress (TMC)-ni dilgipa Dr Mukul Sangma, National People’s Party (NPP)-o napna miksongenga ine jangbingbanganirangko knasona man·engon, da·o dipet iani bidingo NPP-ni dilgiparangde maming kobor dongkuja ine parakatskaaha.
Dr Mukul Sangma, NPP-o napna miksonganirang donga ine jangbingbangenggipa kattarangni gimin sing·doatengon, da·o dipet ua an·tangde iani bidingo maming kobor man·soa dongkuja ine a·dokni Deputy Chief Minister aro NPP-ni state president Prestone Tynsong parakatskaaha.
“NPP-ni state president ong·e anga an·tangan iani bidingo maming koborko man·kujaenga indide na·simang banoniko knasona man·aha?” ine Tynsong sing·doataha.
Opposition dolni dilgipa Dr Mukul Sangma, niamrangko donenba, NPP-o napna miksongenga ine jangbingbanganirangko knasona man·ahachim. Manderangni gisepo jangbingbanganirangko knasona man·ani gitade, Dr Sangma an·tangna Lok Sabha seat-o susana aro an·tangni demechikna a·dokni Cabinet-o biapko on·china dabiani baksa NPP-o napna tik ka·ahachim.
Indake ong·engon, Dr Sangma-ni NPP-o napna miksongenga ine jangbingbanganiko TMC-oniba raken jegalataha aro Dr Sangma gita dakgipa mande, maming saloba party-tangko wate katjawa ine a·kangattokaha.
“Dr Mukul Sangma, maming saloba an·tangni namgnina ba man·gninmangmang party-tangko wate gipin baksa bakrimjawa maina ua niam gita politics-ni kamko ka·gipa mandesa ong·a,” ine TMC-oni kobor on·timgiparang parakataha.
