BAGHMARA: Garo Hills-ni ramarangko name tarina gisiko nanggijagipa company ong·a ine matnangenba, Dudhnoi-oni Baghmara gita Dalu-ona dakanggipa National Highway (NH-217) ramako tarina National Highways Infrastructure Development Corporation of India (NHIDCL)-na pakwataniko, South Garo Hills a·jani social activist Greneth M Sangma-ni jegalatani ja·man Federation of Khasi Jaintia & Garo People (FKJGP) Nongalbibra circle-ba iako raken jegalataha.
Ia NH-217 ramako tarina NHIDCL-na pakwate on·na tik ka·ahani gimin adita salrangna skangsan, South Garo Hills a·jani social activist Greneth Sangma, iani bidingo Union Road Transport & Highways Minister-na sedoatenba, ia ramako NHIDCL-na on·gija State NH Division-ni jakon donaichina didiatahachim.
Iani bidingo FKJGP Nongalbibra circle-ba chakpaaniko on·atengon, “NH-217 ramako tarianio simsak nirokanirang dongjani gimin chinga suk ong·gijaniko parakna ska. Chinga South Garo Hills-ni manderangna ku·rang on·dilgipa dol ong·e, Tura-oni Dalu-ona NHIDCL-ni tarigipa kamrangko nipiltaichina didienga,” ine FKJGP Nongalbibra circle-ni general secretary Austin Sangma parakataha.
Tura-oni Dalu-ona NHIDCL-ni tarienggipa NH-51 ramani bidingo janapatengon, ia ramako NHIDCL matchote tariaha ine official-rangni report-rangode mesoka indiba ramako re·ange nigenchimode, official-rangni report-rango mesokaming melisrangja ine Sangma parakataha.
“Shillong-Baghmara ramaba taria matchota bakan nosto ong·aniko nikna man·aha aro ian NHIDCL-ni kamrangko ka·anio simsakgijaniko mesokani ong·a. Una agreba, Tura Bypass aro Dainadubi-Darugre ramako tarina NHIDCL-na on·aniba namen gualani ong·enga maina ian manderangna kenchakaniko ra·baani ong·enga,” ine FKJGP Nongalbibra circle-ni general secretary parakataha.
Ramarangko tarianio NHIDCL-na batede NH Division-an nangani kri kamrangko ka·e on·a ine janapatengon, NH-217 project-ko NHIDCL-na on·gija State NH Division-on done kamko ka·atchina gita FKJGP, Union Minister-ko didiataha.
