TURA: Garo Hills Autonomous District Council (GHADC)-ni ning·o bading chiwalenggipa Non-Tribal-rangoniko Trading for Non-Tribal (TNT) licence-na tangka dabienga aro Nokmani lekkarang baksana MDC-ni No Objection Certificate (NOC)-rangko bi·enga ine adita salrangna matnanganirang ong·kataniko GHADC-ni Deputy Chief Executive Membor Stevie M Marak raken jegalataha.
Iani bidingo kobor ra·timgiparangna talataniko on·atengon, TNT licence-rangko renew ka·na ba gital dake tarina gita da·o dipet Nokmarangni lekkarangko aro MDC-rangni NOC-rangko nangkujaenga ine Deputy CEM parakataha.
Je manderang ba bading chiwalgiparangan, TNT licence-rangko taripiltaina nangengachim, uamang darangnaba tangka paisa gamgija ba lekkarangko tarichengna nanggijan, GHADC office-ona re·ange tariena man·aigen ineba Marak talataniko on·angaha.
TNT licence-rangko renew ka·anio ba taripiltaianio neng·nikanirangko man·genchimode, uko ba Taxation-ni Executive Membor In-charge-na u·iatna man·aigen ineba Deputy CEM ku·rachakaniko on·ataha.
Bading chiwalgiparangoniko District Council, niam gri kajinarangko gilenga ine Tura MDC Bernard N Marak-ni matnanganirangna aro kajinarangko gamjachina didiatanina aganchakaniko on·angengon, maio pangchake District Council-ni kajina gilaniko champengna jotton ka·enga ine Deputy CEM sing·doataha.
“A·bachengonin bading chiwalgiparangoniko GHADC, kajinarangko gilenga ong·ode maini gimin da·o kajina gilaniko champengna jotton ka·skaenga?” ine Marak sing·doataha.
Tura MDC-ni ku·pattianiko ra·e, bading chiwale cha·enggipa gipin jatrang, kajinarangko gamjagenchimode ba TNT licence-rangko renew ka·ja ong·ode, uamangni dokkanrangko aro bading chiwalanirangko GHADC, chipatana agre gipin cholrang dongjawa ine Deputy CEM mikrakataniko on·angskaaha.
An·tangtangni licence-rangko taripiltaianio maiba neng·nikanirangko chagrongna nanggenchimode GHADC-ni dilgiparangna ba officer-rangna u·iatna man·aigen ine janapatengon, bading chiwale cha·enggipa Non-Tribal-rang, NOC ba gipin lekkarangko tarichenggija District Council office-ona re·ange tariena man·aigen ine Deputy CEM ku·rachakaniko on·angtaiaha.
