GHADC-ni on·gipa TNT licence-rangko name nipiltaichina ASPF dabia

TURA: Garo Hills Autonomous District Council (GHADC)-o Trading for Non-Tribals (TNT) licence-ko renew ka·na ba gital dake taripilna No-Objection Certificate (NOC) ba uandakgipa maming lekkarangko nangjawa ine GHADC-ni Deputy Chief Executive Membor (Dy CEM) Stevie M Marak-ni kobor ra·timgiparangna parakatani ja·man uni iandake agangipa kattarangko A·chik State People’s Front (ASPF) jegalatenba, gipin biaprangoni Tribal ong·gijagipa manderang, Garo Hills-o niam gri bading chiwale cha·na man·jana gita GHADC-ni on·gimin pilak TNT licence-rangkon audit ka·china ba name nipiltaichina dabiangaha.
TNT licence-rangko renew ka·anio darangonikoba NOC ba gipin lekkarangko ra·na nangjawa aro maiba neng·nikanirangko man·genchimode GHADC-ni dilgiparangna ba official-rangna u·iatna man·aigen ine Deputy CEM-ni parakatgipa kattarangko jegalatengon, uni iandake skatang ning·tue chanchichenggija agananiara Garo Hills-o niam gri bading chiwale cha·enggipa aro songdongenggipa manderangna chakpaaniko on·ani gita ong·e, manderangko ding·chaoatani gita ong·enga ine ASPF-ni general secretary Bernita R Marak parakataha.
“Taridapgimin Green Book-ni ning·o on·gimin niamrangara an·tangtangni ska gita ja·rikna on·gimin niamrang ong·ja indiba ian Garo Hills-ni Tribal manderangko chel·chakanio mongsonggipa niamrangan ong·a. TNT licence-rangde GHADC-ni ning·o songdongkamgipa Non-Tribal-rangna dongimin licence-sa ong·a aro ia niamko kakket aro bebeo ja·rikna nangchongmota. Ia niamko pe·anide Council-ni dangdike on·enggipa manderangni kosako re·ani gitasa ong·enga,” ine Marak parakataha.
GHADC-ni saksa mongsongbatgipa dilgipa ong·e, iandakgipa kattarangko agananiara, uni name sandichenggija ba ma·sichenggija aganako mesokani gitasa ong·enga ineba ASPF-ni general secretary matnangataha.
GHADC-ni a·palrango donggipa gipin jatrangba GHADC-ni TNT licence-rangko tarie Garo Hills-o bading chiwale cha·na man·enga ine an·tangni suk ong·gijaniko parakatengon, Assam-ni Hatsinggimari-o donggipa Non-Tribal mande saksa, Garobadha-o petrol pump-ko chalaina man·aha ine ASPF-ni general secretary, toe janapataha.
“Iandake matnanganirangko sandirokna nangengoba, ian kakket ong·ja ine donchipnade man·jawa. Jeon wal·ku donga, unode wa·alba donga ine aganani gnang aro iandakgipa matnanganirangko am·sandianide bilo ong·enggipa manderangni daitoan ong·a,” ine Marak parakataha.
Indake ong·engon, GHADC-ni a·palrangoni Tribal ong·gijagipa manderang, Garo Hills-o bading chiwale cha·na man·jana gita GHADC-ni on·gimin pilak TNT licence-rangko somoi done audit ka·china aro gipin biaprangoni Non-Tribal-rangnaba TNT licence-rangko on·aha ong·ode, iandakgipa licence-rangko den·galpilchina ASPF, GHADC-ni dilgiparangko didiataha.