CM, Tura-na kror 150 damni urban infrastructure project-ko paraka

TURA: Meghalaya-ni Chief Minister Conrad K. Sangma, Sukrobar salo Tura-o kror 150 damni urban infrastructure project-na pangchakaniko songe on·aha. Re·baenggipa bilsi 2027-o sokachaknasienggipa chang 39-gipa National Games-na skang Tura songjinmako commercial, cultural aro tourism-ni a·damona tang·daotna miksonge project-ko parakataha.
Project-ni ning·o Najing Bazar-ko namdapatgen, Dakopgre-o multi-level car parking-ko aro cinema complex-ko rikgen, SMELC building aro Art and Culture promenade-ko nambate rikgen, museum spaces, CM Youth Centre aro Active Ageing Centre-rangko rikgen.
Tom·anio bakko ra·e aganprakatmitingo Chief Minister Conrad Sangma, sorkarini CM Connect-ni aro digital service delivery system-ni gita a·dokni manderangni namgnina ja·ku de·anirangko parakangaha.
“A·dokni pilak sakprakprak manderangan sorkari baksa agangrikna cholko man·a nanga. 1971 helpline, ian neng·nikarangko badi ka·ani segatna dongipa system ong·a, ianona segatgipa gimik mamlarangko somoi gita ta·raken nirokenga ine agane CM, mikkangchi a·dokni gimik ge 56 block-rango CM Connect Office-rangko rikgen, ian district headquater-ni kamko olgrokatgen ine parakaha.
Uandake Tura-na chanchigipa urban transformation plan-ni gimin parakataon, CM Sangma indine aganaha, “Najing Bazar Redevelopment Project, jean kror 60.76 damni ong·a, ia project-o commercial complex, parking, hotel, banquet hall, ge 200 dokanrangko rikanggen.
Kror 51.21-ni  Dakopgre multi-level parking aro cinema complex-o bol 200 garirangko donna man·gen, ge·gittam cinema hall, gaming zones aro food court ba cha·ani ringani dokanrang donggen.
Iarangna agreba sorkari, urban cleanliness ba rongtal-an·talanina aro chelchak-naljokanina gisik on·enga. Uni gimin kror 6.51 tangkarangko koros ka·e ge 553 LED smart streetlight-ko tekgen, ge 500 CCTV camera-rangko tekanggen. Tura songjinmako namdapatna namroro-silroroatna ja·ku de·ani miksonganiara National Games 2027-na tarisamsoani bak ong·a, maina iarangan tourism-ko ra·dogen. Gipin biaprangoni sokbagiparang A·chikrangni daka-rikani bewalrangko nie ra·na man·gen aro biapni nitoanirangko nikanggen ine CM parakaha.
Uni gisepon CM, Chief Minister Artists Engagement Scheme-ni gita cheque-rangko suale on·angaha unbaksana Tura Municipal Board mobile application-ko oprakataha.
Tom·anio Garo Hills Autonomous District Council-ni memborrang, official-rang, jolni body representative-rang, artist aro songni dilgiparang bakko ra·angaha.