AMPATI: ‘Acting Locally for Global Impact’ ine pangchakaniko donenba Bristibar salo, International Biological Diversity Day-ko, South West Garo Hills a·jani Betasing Block ning·o donggipa Chiringpara Higher Secondary School (PM SHRI)-o maniangaha.
Ia program-ko Betasing-ni Social Forestry Range, Chiringpara skul aro songni manderang baksa nangrime ong·ataha aro ia salko maniani bak gita noksa salsusaani aro rong nongsusaanikoba, Betasing Higher Secondary School, Emmanuel English School, aro Chiring Higher Secondary School-ni chatro chatrirangna ong·atangaha.
Ia tom·aniko Betasing-ni Range Forest Officer STM M Sangma dilangaha aro rimchaksoani kattarangko Chiringpara Higher Secondary School-ni Principal Johny Miller D Shira aganangskaaha.
Ia tom·anio, Betasing-ni Block Development Officer CRN Sangma, songni nokma aro Malchapara Biodiversity Management Committee-ni membor Mijendro B Marak, Chondonpara Joint Forest Management Committee-ni membor Jackrobath B Marak aro gipinrangba dongpae bak ra·angtokaha.
Ia program-ko ong·atanio, Meghalaya Biodiversity Board-ni Project Assistant Lianchi Marak, Biodiversity Management Committee-ni kamrangko aro miksonganirangko agan-talate on·angenba, samtangtango ong·telaigiparangko ripinganio manderangni bak ra·na nangani gimin aganangaha.
Ia tom·anio Betasing-ni BDO CRN Sangma-ba jinmana aganprakangengon, Meghalaya a·doko donggipa sam-bolrang, do·o-matrang aro pilak ong·telaigiparangko ripinge rakkina nangani gimin aganangenba, plastic-rangko jakkalanichi mai dakgipa namgijanirangko ra·bana man·a, uarangni giminba agan-talataniko on·angaha.
Ia tom·anio, dingtangmancha noksa salsusaani aro rong nongsusaanio chegiparangnaba boksisrangko suale on·angjolaha.
Ia program-ko ong·atanio, ‘Ek Ped Maa Ke Naam’ program-ni ning·o jinma bolrangkoba ge·angaha.
