Adokgre Block-naba DIET-ni seat-rangko block hisap sualchina AHAM didia

TURA: North Garo Hills a·jani Adokgre C&RD Block-ko 2022 bilsion kuliahaoba, North Garo Hills a·jani District Institute of Education & Training (DIET)-na online gita admission-ko ra·anio jakgitel ong·gipa block ine ra·chakkujaengani a·sel Adokgre C&RD Block-ni bang·bata chatro chatrirangan DIET-ni seat-rangko man·tokjaengani gimin Adokgre C&RD Block-naba block hisap seat-rangko on·china aro mande jelbra jelsuani da·o batahani gimin seat-rangko baridapatchina A·chik Holistic Awakening Movement (AHAM) Adokgre regional unit, Adokgre Farmer Producer Cooperative Society, Sardar Association, chatro chatrirang aro Adokgre Block-o skigipani kamna training ra·na senge dongenggipa manderang, Directorate of Educational Research & Training (DERT)-ni Director-na sedoataha.
AHAM Adokgre regional unit-ni parakatani gitade, North Garo Hills a·jao da·o dipet Resubelpara-osan DIET dongkuenga aro ia DIET-o a·jani pilak block-rangnan block hisap seat-rangko tikatengachim. Indake ong·genchimoba, Adokgre C&RD Block-kode online application system-o Kharkutta block inesa mesokengani gimin Kharkutta Block-na chamgipa seat-rangkon Adokgre Block-ni manderangba suale ra·na nangao ga·ake Adokgre Block-ni bang·bata chatro chatrirangan seat-rangko man·tokjaenga ine AHAM Adokgre regional unit parakataha.
“Adokgre C&RD Block-ko 2022 bilsion kuliaha aro una skangde ia jolrangara, Kharkutta C&RD Block ning·osa ga·akachim. Gital administrative block-ko kuliahaon, ia jolrango sorkarini kamrangkoba dingtangsa ka·na nangaha aro uandaken gital block ning·o donggipa manderang, sorkarini namgnirangkoba bate man·na nangaha. Indiba DIET-na online admission system-o Adokgre-kode Kharkutta C&RD Block-ni ning·on inesa chankuengani gimin DIET-ko dakna nangenggipa chatro chatrirang, seat-rangko man·na neng·ani ong·enga,” ine AHAM Adokgre regional unit-ni president Marchborn R Marak parakataha.
Iani bidingo talbate ma·sie ra·na gita RTI ka·e sing·sandiaton, da·o dipet Adokgre C&RD Block-na dingtang seat-rangko chama dongkuja aro online DIET admission system-o Adokgre Block-kode jakgitel ong·gipa block ine ra·chakkuja ine aganchakaniko man·aha ineba Marak parakataha.
Adokgre C&RD Block-ko man·aoni da·o bilsi gittam batpilengaha ine janapatengon, North Garo Hills a·jao DIET-na admission ra·anio Adokgre C&RD Block-koba jakgitel ong·gipa block ine ra·chakchina, online admission system-o Adokgre C&RD Block-koba dingtang block ine ra·chakchina, Adokgre C&RD Block-naba block hisap DIET-ni seat-rangko on·china, 2022 bilsi dipet Adokgre Block-ni man·na nanggipa DIET-ni seat-rangko on·china aro mande jelbra jelsuaniko hisape seat-rangko baridapate on·china AHAM Adokgre regional unit didiataha.