SGH-o dual ID Card donggipa saksa rurini ID card-ko den·galpilchina Nokma se jote on·a

BAGHMARA: South Garo Hills, Chokpot Dagal Asimgre-o ruri saksa A·chik me·chikko ra·e Meghalaya-ni election Identity Card (ID)-ko tarie songdongenganiko Chokpot jolni nangrimgimin NGO dolrang aro Dagal Asimgre-ni Nokma aro songni manderang uni ID Card-ko den·galpilchina dabiaha.
Iani bidingo Dagal Asimgre-ni Nokmani aganani gitade, Sonowal Ali SSA School Headmistress-niko School Transfer Certificate (TC)-ko ra·aha. Uni TC-o an·tangko Sonowal T Sangma ine seenba Nokma document ra·na re·baaha, uandake changni chang re·baani gimin una document-ko on·aha. Ua Nokma document-chi Sonowal election ID card tariaha. Ja·mano uko sing·sandie Assam Mankachol South Salmarani ine ma·sina man·aha unbaksa Assam-ni election ID ba donga aro Assam-o uni nokdangba donga ine ma·siani ja·man uko Nokmani chra depante songo dongna on·jawaha aro uni Meghalaya-ni Election ID Card-ko Election den·galpilchina ine see jote on·aha.
NGO dolrang, batanggimin 2024 bilsioni Assam Mankachor South Salmara-ni Sonowal Ali, Dagal Asimgre-o Dual election tarie songdongenga inako kobor man·e sing·sandion chong·motko ma·sina man·aha. Indake Meghalaya-ni election ID Card-ko den·galpilchina Election Office-na lekka sedoanggen ine aganaha. Iani bidingo Nokmarangna aro School skigiparangna mikrakataniko on·angengon, mikangchi darang A·chik a·songni Nokmarangba aro skigiparangba name take ma·sichenggija skatang rurirangna document ba certificate-rangko on·jachina didiangaha.