SHILLONG: Rajya Sabha election-ko re·baenggipa June 18 tariko ong·atna tik ka·e donahaoba Bristibar salo, nomination-rangko ra·pilna dongimin somoi attamni 3:00 baji ong·ahaon, Meghalaya a·dokni damsamangmang Rajya Sabha seat-na susarimgiparang dongjahani gimin National People’s Party (NPP)-ni dilgipa James K Sangma-kon, a·dokni gital Rajya Sabha MP-na parakataha.
Bristibar attamni 3:00 bajini ja·man ua an·tangni nangchongmotgipa kamrangko matchotatna Meghalaya Legislative Assembly Secretariat-ona re·ange Returning Officer-ko grongeaha aro election-o seoka man·ani certificate-koba ra·chakeaha.
Rajya Sabha-ni gita MP-na seokako man·ani ja·man ua kobor ra·timgipa manderang baksa agangrikengon, Rajya Sabha-ni MP ong·aniara una dal·begipa daitoko jako ra·ani ong·enga aro ua an·tangko on·angani gnang ia kamko ka·gen ine Sangma parakataha.
“Rajya Sabha-ni gital MP-na seokako man·e anga an·tangko onateba nika aro apsan somoion anga rasongba chaa maina chubatgipa Parliament-o a·dokni member ong·aniara namen dal·begipa daitoko jako ra·ani ong·enga. An·tangni daitoko anga talen ma·sienga aro ia kamko anga on·kangani aro kakketo chu·sokatna miksongenga,” ine Sangma aganaha.
Salgro salaram a·dokni member ong·e Parliament-o bak ra·paanio ra·bianirangko janapatengon, salgro salaram a·dokrango member-rang komibatani gimin jeko aganna gitaba somoiko bang·e man·rongja indiba ua somoirangko on·dapchina didironggen ine a·dokni gital Rajya Sabha MP ku·rachakaha.
Rajya Sabha-ni saksa member ong·e uni mongsonggipa daitorangara mai ong·gen ine sing·anina aganchakaniko on·angengon, Khasi aro Garo ku·sikrangko Constitution-ni Eighth Schedule-o napatani aro Inner Line Permit (ILP)-ko ra·gatchina dabiani bidingo ku·rang on·anian mongsonggipa ong·gen ine Sangma, ku·rachakaniko on·angaha.
“Meghalaya a·doko an·ching Khasi aro Garo ku·sikrangko Eighth Schedule-o napatchina dabienga aro iasan ong·aigija gipin dingtang dingtang nanganirangba dongkuenga. ILP-na dabianiko niatgenchimoba, an·ching Meghalaya Legislative Assembly-oba iana resolution-ko ra·manaha, uni gimin da·o anga saksa Rajya Sabha-ni member ong·e, iandakgipa a·dokni nanganirangna ku·rangko on·na nanggen,” ine Sangma parakataha.
Parliament-ni saksa member ong·e ua, ma·mongni dingtang dingtang scheme aro program-rangko a·dokna man·bae on·na krenge kamko ka·gen ineba NPP-ni dilgipa, ku·rachakaniko on·angaha.
Uni Rajya Sabha seat-na susaaniko MDA-ni mitam member-rang namniktokjaha ine matnanganiko jegalatengon, “Iandake agananiara namen kakket ong·ja maina angni nomination file ka·ani somoioba na·simangan nikaha, angbaksa dongpagiparangara NPP-ni MLA-rangsan ong·ja indiba MDA-o bakrimenggipa gipin party-ni MLA-rangba donga,” ine Sangma aganaha.
