AMPATI: South West Garo Hills a·jani Garobadha-Dalu (State Road-12) ramao, Km 50-gipa Tarapara-oni dal·dalgipa garirangni re·ruraaniko champengna gita South West Garo Hills a·jani District Magistrate, Bharatiya Nagarik Suraksha Sanhita (BNSS), 2023-ni Section 163 ning·o dingtangmancha ge·etaniko on·angaha.
Ia ramani bakrang, dal·dalgipa gari gorarangna re·na namjaengaha ine PWD (Roads) Ampati Division-ni u·iataniko man·soani ja·man, South West Garo Hills a·jani District Magistrate, ia ge·etaniko on·angaha.
PWD (Roads) Ampati Division-ni u·iatani gitade, ia rama gita dal·dalgipa garirang re·ruraenba, ramao re·na man·gija dongrongenga aro ian gipin garirangni re·ruraanirangkoba champengatan baksana ramarangko nosto ong·dapa gita ong·enga.
Indake ong·engon, manderangni naljokgnina aro ia rama nosto ong·roroangjana gita, ia ramarangko taria matchotkujaskal aro PWD (Roads) Ampati Division-oni, ia ramako dal·dalgipa garirang re·na man·aignok ine parakkujaskal, ia rama gita dal·dalgipa garirangni re·ruraaniko champengatchengaha ine South West Garo Hills a·jani District Magistrate u·iataha.
Ia ge·etaniko manichina gita dal·dalgipa garirangna ge·etaniko on·atengon, ia niamko manijagenchimode dongimin niamrango pangchake rakgipa sastirangko man·gen ine District Magistrate mikrakataniko on·ataha.
SWGH-ni Tarapara rama gita dal·dalgipa garirangni re·ruraaniko champengata
Date:
Share post:
