SHILLONG: India a·songni Prime Minister Narendra Modi-ni dilanichi BJP sorkari, a·songni pilak biaprangon namroro silroroaniko ra·baahani gimin Meghalaya a·dokni manderangba, Bharatiya Janata Party (BJP)-o ka·dongrorona a·bachengengaha ine Sukrobar salo, BJP-ni dilgipa aro Union Minister Shantanu Thakur parakataha.
Iani bidingo kobor ra·timgipa manderang baksa agangrikengon, a·songni pilak biaprangon, pilakni gitan namroro silroroaniko ra·bana gita BJP kamko ka·enga aro Meghalaya a·dokoba manderang, BJP-o ka·donganirang batroroanggnok ine Thakur, an·tangni ka·dongchakenganiko parakataha.
West Bengal a·doko jekai BJP, ru·uta bilsirangni ja·man sorkariko rikna man·aha, apsan daken Meghalaya a·dokoba man·genma ine sing·anina aganchakaniko on·angengon, BJP-ni mongsonggipa miksonganian, manderangona sorkarini kamrangko sokatani aro ma·mong sorkarini namroro silroroaniko mesokani ong·enga ine Union Minister aganaha.
“India a·songo maikai BJP kamko ka·enga, na·simang name niatbo. Ia party ta·raken kamko ka·enga aro pilak kamrangon namroro silroroaniko ra·baenga. Meghalaya a·dokni manderangba ia namroro silroroaniko man·enga ong·ode, uamangba BJP-o ka·dongna a·bachengaigen,” ine Thakur aganaha.
Meghalaya a·doko BJP dal·rorona gita somoiko nanggen maina walsanode party, dal·na gita man·jawa ineba ua aganaha.
“A·dok ge·antiode biterangko man·na amja. Indiba mikkangchi BJP, Meghalaya a·doko chu·sokgipa ong·gen,” ine Thakur, an·tangni ka·dongchakenganiko parakataha.
Meghalaya a·doko ku·aganani bewalrang aro biapni gita dingtangani a·selba BJP, dal·rorona man·jaenga ineba Union Minister aganaha.
“West Bengal a·doko manderang Modi sorkarini kamrangko altuaen nikna aro ma·sina man·a indiba Meghalaya a·dokode biapni kri dingtangaia. Biap ge·antichina sokate, sorkarini kamrangko mesokani on·nade somoi aro bilrangko nangaia,” ine ua aganaha.
Ian BJP-na kamko ka·enggipa manderangni a·sel ong·ja ineba ua talataniko on·angtaiaha.
“Chingni party worker-rang, rakbee kamrangko ka·enga aro Meghalaya a·dok gimikon party-ko bilakbatatna krenge kamko ka·enga,” ine Thakur aganaha.
West Bengal a·dok baksa tosusae janapangengon, West Bengal a·dokoba BJP skangode manderangni ka·donganiko man·na namen neng·beani ong·achim ine Thakur parakataha.
“Skangode West Bengal-oba apsan dakgipa obostakon chagrongna nangachim indiba ka·sinsin manderang, BJP aro NDA sorkario ka·dongna man·aia ine ma·sina a·bachengaha. Manderango iandakgipa ka·dongani dongahaosa party-de dal·rorona man·a,” ine Union Minister Thakur aganaha.
Salgro salaram jolrango namroro silroroaniko ra·baanian a·songni Prime Minister Narendra Modi-ni mongsonggipa miksongani ong·a ineba ua aganaha.
