SHILLONG: Susagrikgipa political dolrang, re·baenggipa Shillong Lok Sabha by-election-na tarisoanirangko bilakatengon, BJP, party-ni candidate-ko parakatna somoi ra·kugen, Election Commission-ni poll-na tarikko on·a ja·mansa chanchigen ine parakaha.
VPP-ni MP Dr Ricky AJ Syngkon siangani gimin by-election-ko ong·atna nangaha.
Party, ning·in ning·inde candidate-ko basena a·bachengatjok, da·odipet sak 9 manderangni party ticket-na dorkasto on·akoba man·sojok indiba iani bidingo ning·tue chanchia dongkuja, bon·kamede BJP-ni central parliamentary board-sa tik ka·gen ine State BJP General Secretary Wankitbok Pohshna aganaha.
Election-na party-ni seokgipa candidate-o parakatna somoi bang·kuenga uni gimin ka·sinsin iani bidingo chanchirimgen.
Minggipin da·omitingo a·doko electoral rolls-ni Special Revision (SIR)-ni kamrang re·enga, haida Election Commission-ni bypoll -ni tarikko parakatna skangde SIR-ni kamrang matchotnaba dongjok.
“Chingni u·iani gitade SIR-ni kamrang matchotkuja dipet election-ko ong·atjawa ine Pohshna aganaha.
Party candidate-ko baseani bidingo BJP dilgiparang, adita changna tom·e chanchirimaha indiba bimingrangko paraka dongkuja. Saksku manderangni dorkastoko man·aha, candidate-ko seokna dilgiparang ning·tue chanchienga. Uni ja·man central leadership-ona watatgen.
Election-ni tarikko man·a ja·mansa BJP, candidate-ni bimingko parakronga, apsan daken party, mikkangchiba iakon ja·rikanggen ine Pohshna aganaha.
