NEW DELHI: Dingtang dingtang agency ba commission-ni ning·o ong·atenggipa Competitive Exam-rango Salgro-salaram a·dokni chadamberangba nambate bakko ra·na man·na gita NE a·jolo exam centre-rangko kulidape on·china gita Sombar salo Union Public Service Commission (UPSC), Staff Selection Commission (SSC), Railway Recruitment Board (RRB), aro Department of Personnel and Training (DoPT)-ni a·gipi Official-rang baksa Sombar salo chanchirimaniko dakanio Turani MP, Saleng A. Sangma didiangaha.
A·songo mongsonggipa recruitment board ba agency-ni a·gipi Official-rang baksa chanchirimaniko dakengon, Ma·mong sorkarini ning·o bangbang dongenggipa biaprango kragipa candidate-rangko ta·rake seokenba kamrangko ka·atchina didiaha. Iandake kamna rimnapanio ka·sinengani a·sel lakni lak chadamberang, mongsongbate Salgro-salaram a·dokrangoni cholrangko man·gija ja·man chakenga ineba Tura MP aganaha.
Salgro-salaram a·dokni chadamberang competitive exam ba porikkarangko sena gita chel·begipa biaprangona re·angna nangengon tangka-paisani a·sel aro ugita gipin gipin neng·nikanirangni a·sel indakgipa niksenggipa porikkarango chu·sokna ja·manchakenga. Unigimin gisiko nanggipa chadamberang maikae iandakgipa neng·nikanirangchi ja·donggaatako mikkang man·jawa, aro altuae porikkarangko sena man·na gita Shillong aro Tura-o UPSC, SSC, RRB aro gipin kamrangna porikka sechakram centre-rangko kulidape on·china gita Saleng Sangma, a·gipi Official-rangko mol·molaha.
