TURA: South Garo Hills a·jao, Karukol-oni Siju, Dabalgre aro Rongmigre gita Chokpot-ona dakanggipa ramako tarina gita ta·raken kamrangko a·bachengatchina didie Garo Students Union (GSU) Siju regional unit-ni dilgiparang, Nokatgre, Tolegre, Nengrugittim, Siju aro Dabalgre songni manderang baksa South Garo Hills a·jani Deputy Commissioner-na memorandum-ko on·angaha.
South Garo Hills a·jani Deputy Commissioner-na sedoatgipa chittio GSU Siju regional unit aro dingtang dingtang songko nokko dilenggipa manderangni parakatani gitade, ia ramara, Karukol, Siju, Dabalgre, Rongmigre aro uandakgipa dingtang dingtang songni manderangna namen nangchongmotgipa rama ong·a indiba ia ramako tarina tik ka·aniko, badiaba badiaba dolrang, mongsongbate Emangre songoni mitam dolrang jegalahani a·sel ia ramako tarina gita da·onan kamrangko a·bachengatkujaengachim.
“Chingni songrangona ramarang namjani a·selan sagipa manderangko salruraanio, game ge·e man·gipa bosturangko salruraanio aro dingtang dingtang kamrangko ka·anioba neng·nikanirangko chagrongna nangtokenga. Ia ramara chingni songrangna namen nangchongmotgipa rama ong·a aro ia ramako tarigija donchipani a·sel chingni songrango donggipa manderang neng·nikanirangko chagrongna nangtokenga,” ine GSU Siju regional unit aro dingtang dingtang songni dilgiparang, South Garo Hills a·jani Deputy Commissioner-na sedoatgipa chittio parakataha.
Ia ramako tarie on·genchimode, ian Wari Chora, Siju Cave aro uandakgipa dingtang dingtang tourist spot-rangonaba ramako namdapatanichi, gipin biaprangoni manderangko salbana dakchakani ong·gen aro ian songni nokni manderangna janggi tangani cholrangko on·skana dakchakgen ineba GSU Siju unit aro dingtang dingtang songni dilgiparang parakataha.
Ia ramako tarina gita ta·raken kamrangko a·bachengatchina Deputy Commissioner-ko didiatengon, kamrangko maming neng·nikani gri somoi gita matchotatna songni manderang pilak nanga dakchakanirangko on·na kusi ong·aigen ine GSU Siju regional unit aro dingtang dingtang songni dilgiparang, ku·rachakaniko on·angaha.
