TURA: India sorkarini ning·o donggipa Cooperation Ministry-ni bongagipa Foundation Day-ko maniani bak gita antigimikna manianggipa Cooperative Week-ko Sombar salo, Babadam-o donggipa All Garo Hills Multipurpose Cooperative Society (AGHMPCS) Ltd-o dingtangmancha program-ko ong·atenba matchotataha.
Ia program-ko West Garo Hills Cooperative Societies-ni Assistant Registrar Office, Meghalaya Cooperative Apex Bank Ltd. (MCAB), National Bank for Agriculture and Rural Development (NABARD), Meghalaya Basin Management Agency (MBMA), Tura Urban Cooperative Bank Ltd. (TUCB) aro All Garo Hills Multipurpose Cooperative Society Ltd. (AGHMPCS) baksa nangrime ong·ataha.
Program-ko a·bachengatanio, West Garo Hills Cooperative Societies-ni Assistant Registrar, rimchaksoani kattarangko aganangengon, cooperative-ni kamrangko mangrakbatatna nangengani gimin janapangenba, cooperative society-rango bak ra·china chadamberangko didiangaha.
Ia tom·anio, antigimikna Cooperative Week-ko manianio ong·atanggipa dingtang dingtang program-rangkoba video-chi jinmana mesokangaha.
Ia tom·anio AGHMPCS-ni Director Fr Sunny Mavelil-ba jinmana aganprakengon, cooperative society-rangni dal·roroanio chadamberangni bak ra·pana nangani gimin janapangenba, dingtang dingtang cooperative society-rango bak ra·e, a·songni dal·roroanina on·gilchina chadamberangko didiangaha.
Ia program-ko ong·atanio, West Garo Hills NABARD-ni District Development Manager, Dalu Block-ni in-charge aro West Garo Hills-ni Senior Cooperative Officer Velorich D Sangma aro gipinrangba dongpae jinmana aganprakangaha.
