AMPATI: Lekka porani gadangko tang·doatna ja·ku de·ani bak gita Budbar salo, South West Garo Hills a·jani ning·o donggipa dingtang dingtang skulrango, poraienggipa bi·sarangni ma·a paarang aro skigiparangni gisepo tom·e agangrikanirangko ong·atangaha.
Ia tom·anirangko ong·atanio, detangtangni lekka pora ra·aniko namdapatna gita bang·a ma·a paarangan, gisiko nangbee bak ra·angtokaha aro ia tom·anio, skulko dilenggiparang aro skigiparang, maikai chatro chatrirangni poraianiko namdapatna man·gen, uarangni bidingo ma·a paarang baksa chanchirimangaha.
Skulosan ong·aigija noktangtangoba chatro chatrirang, poraianio gisik on·na man·na gita detangtangni poraianirango dakchakanirangko on·china gita ia tom·anio skigiparang, ma·a paarangko didiataha.
South West Garo Hills a·jani dingtang dingtang skulrang, jekai Ballonggre SSA UPS, Jholgaon SSA UPS, Wakkagre Kamagre SSA UPS, Dalbotpara A·pal SSA LPS, Jigatalpara SSA LP School, Indikgre SSA UP School aro uandakgipa skulrango, ia Parent-Teacher Meet ba ma·a paarang aro skigiparangni tom·aniko ong·atangaha.
Ia tom·anio, chatro chatrirangni porikkarango chu·sokani, skul re·baa re·bagijani, chatro chatrirangni dakbewal aro skigiparangni sing·anirangna aganchakanirangko ma·a paarangna agan-talate on·angaha aro ma·a paarangkoba, dedrangni poraiani aro skul re·anirango nambate nirokchina didiangaha.
