Songni nokni namgnina chamatgipa tangka paisarangko jakkalsretjachina dabia
TURA: Nokma Sani Union-ni tom·bimonganiko re·anggipa Bristibar salo, Tura-ni District Auditorium-o ong·atangaha aro ia tom·bimonganio, Garo Hills-ni Nokma-Sanirang, Fifteenth Finance Commission-ni ning·o Rural Local Bodies (RLB) ba songko nokko chalaienggipa dolrangna sorkarini chame on·atenggipa tangka paisarangko jakkalsretengani gimin chanchirimangtokaha.
Ia tom·anio Nokma-Sanirang chanchirimani ja·man, songko nokko chalaienggipa dolrangna sorkarini chame on·atenggipa tangka paisarangko contractor-rang gita koros ka·engani gimin raken jegalangtokaha aro ia tangka paisarangko Nokma-Sanirang gitasa koros ka·china dabiangaha.
Iandake songni nokni namgnirangna sorkarini chame on·atenggipa tangka paisarangko contractor-rangchi kamrangko ka·ataniara, songko nokko namroro silroroatna miksonganiko aro Meghalaya a·doko Autonomous District Council (ADC)-rangko mangrakbatatna gita India sorkari, Meghalaya sorkari aro Garo dolrangni gisepo songgigrikaniko pe·ani gita ong·enga ine ia tom·anio Nokma Sani Union matnangataha.
Meghalaya a·dokara, Indian Constitution-ni Article 243M ning·o Panchayati Raj system-oni watchanggalako man·gipa ong·e, Fifteenth Finance Commission-ni ning·o songko nokko chalaienggipa bimangrangna Autonomous District Council-rang gitasa tangka paisarangko sorkari watatenga ine janapatengon, Fifteenth Finance Commission-ni tied aro untied grant-rangara, songo noko namroro silroroani kamrangna chamatgipa tangka paisarangsa ong·ani gimin ia tangka paisarangko Nokma-Sanirangsa jakkalna bilko man·na nanga ine Nokma Sani Union dabiangaha.
Songni nokni namgnina chame on·atenggipa tangka paisarangko Rural Local Body/Village Council/Gram Panchayat/Village Employment Council aro Program Executive Implementation Committee-rangna on·ani pal GHADC-ni Executive Committee, ia tangka paisarangko contractor-rang gitasa jakkalskaenga ineba Nokma Sani Union matnangataha.
RLB-na chamatgipa pilak tied aro untied grant-rangko RLB/VC/GP/VEC aro PEIC-rangnasa on·na nanga ine dabiangengon, “Iani bidingo Nokma Sani Union, GHADC-ni Chief Executive Membor-na sedoatmanaha aro iani bidingo GHADC, maming ja·kurangko de·chipjagenchimode, jatna aro jatko dilgiparangna on·gimin bilrangko chel·chakna gita kachario badi ka·na draatako man·gen,” ine Nokma Sani Union, mikrakataniko on·angaha.
Gipin biaprangoni kam ka·e cha·giparang aro bading chiwalgiparangko Garo Hills-ni a·kingrango nokchakna gita A·king Nokmarangna on·gimin bilko mangrakbatatna gitaba ia tom·anio Nokma Sani Union tik ka·angaha.
Nokma Sani Union-ni tom·bimonganio, Tura-ni MDC Bernard N Marak, GHADC-ni gitcham Deputy CEM Nikman Ch Marak, ma·mong aro a·dok sorkari baksa songgigrikanio soi ka·gipa ANVC dolni gitcham commander-in-chief Jerome Momin, GSMC-ni acting chairman Balkarin Marak aro gipinrangba dongpae bak ra·angaha.
