AGHPMCS-ni gital cashew processing unit-ko Damal A·sim-o kulina sienga
TURA: Garo Hills-o game ge·e cha·giparangni janggi tangani gadangko tang·doatna gita All Garo Hills Multipurpose Cooperative Society (AGHMPCS) kamrangko ka·engon, NABARD aro Meghalaya sorkarini dakchake on·enggipa agriculture program-ni bak gita Climate Change Fund (CCF) – Interest Differential (ID) Scheme-ni ning·o ia society, Gambegre, Dalu, Ampati, aro Chokpot Block-rango game ge·e cha·enggipa sak 309 manderangna gimik pang 20,049 cashew chararangko sualatna man·aha.
Ia cashew chararangko AGHMPCS, Karnataka a·dokni ICAR-Directorate of Cashew Research (ICAR-DCR)-oniko breaha aro ia chararangko da·o, kosako janapgimin block dambrini bigha 1,278.2 ong·gipa a·arangko ge·anggnok ine u·iataha.
AGHMPCS-ni u·iatani gitade, jo·ongrang cha·ani a·sel aro bolrang breahani a·sel West Garo Hills-o cashew-ko man·anirang komiengaha ine nikna man·ani ja·man, ia cashew chararangko game ge·e cha·giparangna suale on·angaha.
Garo Hills-o cashew bagan dakna gita a·arang nama ine nikenba AGHMPCS-ni official-rang, NABARD, Meghalaya sorkari aro ICAR baksa agangrike, ia kamko chu·sokatna man·aha.
Ia program-ni gnigipa bako AGHMPCS, gipin sak 300 game ge·e cha·giparangnaba apsan daken cashew chararangko suale on·angkuna tik ka·aha ine u·iataha.
Indake ong·engon, game ge·e cha·giparangoniko cashewnut gittangko breenba, uarangko cashew processing unit-rangko tarie, game ge·e cha·giparangna namgnirangko on·na a·bachengataha ineba AGHMPCS u·iataha.
AGHMPCS-ni u·iatani gitade, skang salrango game ge·e cha·giparang, maming chol dongjae, an·tangtangni game ge·e man·gipa cashew nut-rangko bading chiwalgiparangna dam komie pale galna nangaiachim indiba da·ode AGHMPCS-ni cashew processing unit-ko kuliahani gimin, game ge·e cha·giparangoniko cashew nut gittangko breenba, ia processing unit-o tariskaengaha aro iachi game ge·e cha·giparangba namgnirangko man·engaha.
AGHMPCS-ni gital cashew processing unit-ko re·baenggipa October jao, Damal A·sim songo kulina sienga aro iani bidingo Damal A·sim songni kam ka·giparang, Asingre Cashew Processing Unit-o kam ka·giparang baksa batanggimin sal 15-na AGHMPCS Head Office-o training-ko ra·soengaha ineba u·iataha. Ia training program-ko Micro Enterprises Development Program (MEDP)-ni ning·o NABARD-ni dakchakanichi ong·atenga.
