SHILLONG: National People’s Party (NPP)-ni dilgipa aro Dadenggre constituency-ni gitcham MLA James K Sangma Sombar salo, a·dokni gital Rajya Sabha MP ong·e ku·mikchetaha aro uni ku·mikchetanio, a·dokni Chief Minister Conrad K Sangma, uni ma·gipa Soradini K Sangma, uni ma·drangrang aro NPP-ni dilgiparangba dongpae bak ra·angaha.
Rajya Sabha MP ong·e ku·mikchetaniko James K Sangma, Hindu ku·sichi dakaha aro uni ku·mikchetaniko,Rajya Sabha-ni Chairman CP Radhakrishnan dilangaha.
A·dokni gital Rajya Sabha MP ong·e ku·mikchetani ja·man James Sangma, an·tangni jonggipa aro a·dokni Chief Minister Conrad K Sangma, an·tangni ma·gipa Soradini K Sangma, an·tangni nokdang, ma·drangrang, party-ni dilgiparang aro a·doko songdongenggipa manderangkoba mittelpilataha.
“Anga a·dokni ku·rangko bama gnang Parliament-ona ra·anggen aro salantian an·tangko gital dake on·kangna ka·gen,” ine Sangma, social media-o parakataha.
Rajya Sabha-ni MP ong·na gita cholko man·ahani gimin ua dingtangmancha an·tangni pagipa sagi aro Lok Sabha-ni gitcham Speaker Purno A Sangma-koba gisik ra·e mittelpilangaha.
James Sangma-ni gital Rajya Sabha MP ong·e ku·mikchetanina a·dokni Chief Minister Conrad K Sangma-ba an·tangni namgipa skaniko on·ataha.
“James Sangma, a·dokni manderangna ku·rang on·gipa ong·china aro Meghalaya a·doknasan ong·aigija a·song gimiknan an·tangni kamrangchi on·gilangkuchina,” ine Chief Minister parakataha.
